مہاوکاس اگھاڑی سانگلی میونسپل کارپوریشن کا انتخاب متحدہ طور پر لڑے گی: جینت پاٹل
آئندہ دو سے تین دن میں نشستوں کی تقسیم پر بات چیت مکمل ہو جائےگی
سانگلی: مہاوکاس اگھاڑی میں شامل تمام اتحادی پارٹیاں سانگلی میونسپل کارپوریشن کا انتخاب متحد ہو کر لڑیں گی اور شہر کے دیرینہ مسائل کو مشترکہ طور پر اٹھا کر ترقی کی سمت میں کام کریں گی۔ یہ اطلاع این سی پی- ایس پی کے سینئر لیڈر جینت پاٹل نے دی ہے۔ انہوں نے کہا ہے کہ حکمراں طبقے نے سانگلی شہر کو پیچھے دھکیل دیا، شہر کی ترقی کو مسلسل نظر انداز کیا گیا اور بنیادی مسائل کو حل کرنے میں مکمل ناکامی کا مظاہرہ کیا۔
سانگلی، میرج، کُپواڑ میونسپل کارپوریشن انتخابات کے تناظر میں مہاوکاس اگھاڑی کے لیڈروں کی ایک مشترکہ پریس کانفرنس منعقد ہوئی، جس سے خطاب کرتے ہوئے جینت پاٹل نے کہا کہ آئندہ دو سے تین دن کے اندر اتحادی پارٹیوں کے درمیان نشستوں کی تقسیم سے متعلق بات چیت مکمل کر لی جائے گی۔ انہوں نے واضح کیا کہ انتخابی میدان میں ایم وی اے ایک متحد قوت کے طور پر اترے گی اور شہر کے مفاد میں اجتماعی قیادت کے ساتھ انتخاب لڑا جائے گا۔ اس موقع پر سابق وزیر وشوجیت کدم، رکن پارلیمنٹ وشال پاٹل اور دیگر لیڈران موجود تھے۔
جینت پاٹل نے کہا کہ بلدیاتی کونسلوں اور نگر پنچایتوں کے نتائج ابھی مکمل طور پر سامنے نہیں آئے ہیں، لیکن اس کے باوجود اگلے انتخابات کا اعلان کر دیا گیا ہے، جو ایک غلط روایت بنتی جا رہی ہے۔ ان کا کہنا تھا کہ اصولی طور پر ایک انتخاب کا نتیجہ مکمل ہونے کے بعد ہی اگلے انتخابی عمل کا آغاز ہونا چاہیے تھا۔ انہوں نے اس تناظر میں عوام میں ای وی ایم سے متعلق پائی جانے والی شکوک و شبہات کا بھی حوالہ دیا اور کہا کہ ٹیکنالوجی میں ترقی کے ساتھ ہی شفافیت کے بارے میں سوالات پیدا ہو رہے ہیں، اس لیے ووٹوں کی گنتی میں تاخیر نہیں ہونی چاہیے تھی۔
وشال پاٹل کے حوالے سے بات کرتے ہوئے جینت پاٹل نے کہا کہ ان کا سیاسی ڈی این اے کانگریس کا ہے، اسی لیے وہ مہاوکاس اگھاڑی کے ساتھ مضبوطی سے کھڑے ہیں۔ انہوں نے اعلان کیا کہ سانگلی میونسپل کارپوریشن کے انتخابی عمل کی قیادت وشال پاٹل کے پاس ہوگی اور تمام اتحادی جماعتیں ان کی قیادت میں انتخابی حکمت عملی طے کریں گی۔ اسی دوران اسمبلی میں گفتگو کے دوران اپنے ایک بیان پر وضاحت پیش کرتے ہوئے جینت پاٹل نے کہا کہ اگر ان کے کسی لفظ سے نائی سماج کو ٹھیس پہنچی ہو تو وہ دل سے اس پر معذرت خواہ ہیں۔ انہوں نے کہا کہ ان کا مقصد کسی بھی سماجی طبقے کی دل آزاری نہیں تھا اور وہ سماج کے تمام طبقات کے احترام پر یقین رکھتے ہیں۔
ماحولیاتی مسائل پر بات کرتے ہوئے جینت پاٹل نے کہا کہ تپوون علاقے میں درختوں کی کٹائی کر کے مستقبل میں کسی منصوبے کو لانے کا خواب اگر کوئی دیکھ رہا ہے تو وہ پورا نہیں ہوگا۔ انہوں نے کہا کہ اس سے پہلے بھی کمبھ میلہ ناسک میں منعقد ہو چکا ہے اور اس کی منصوبہ بندی کوئی نیا چیلنج نہیں ہے۔ درحقیقت جنگلات کی تباہی کے باعث جنگلی جانور انسانی آبادیوں کی طرف آ رہے ہیں، جس سے انسانی جانوں کو خطرہ لاحق ہو رہا ہے۔ ایسی صورتِ حال میں مزید درختوں کی کٹائی روکی جانی چاہیے اور حکومت کو فوری مداخلت کر کے ماحول کے تحفظ کو یقینی بنانا چاہیے۔
NCP-SP Urdu News 15 Dec. 25.docx