ناندیڑ (ورق تازہ نیوز) ناندیڑ دیہی پولیس تھانے کی حدود میں ایک نوجوان کو قتل کرکے اس کی لاش بند کمرے میں چھپا کر رکھنے کا سنگین معاملہ سامنے آیا تھا۔ واقعہ کی سنگینی کو دیکھتے ہوئے ناندیڑ دیہی پولیس نے فوری کارروائی کرتے ہوئے چند ہی گھنٹوں میں مرکزی ملزم کو حراست میں لے لیا۔مقتول سنی اجب سنگھ مسیح (عمر 36 سال، ساکن ایشانگر، بٹالہ، ضلع گرداسپور، پنجاب) اور ملزم داراسنگھ گرونام سنگھ وشنو پوری شیو ار میں ایک کمرے میں کرائے پر رہتے تھے۔ سنی نے ملزم کی چھروں والی بندوق چھین لی تھی اور واپس نہیں کی تھی، جس کے باعث دونوں کے درمیان تنازع پیدا ہوا۔
اسی تنازع کے دوران 29 ستمبر 2026 کی رات تقریباً 10 بجے ملزم داراسنگھ نے پتھر سے سنی کے سر اور چہرے پر شدید وار کرکے اسے موقع پر ہی قتل کردیا۔ اس کے بعد لاش کو کمرے میں چھپا کر باہر سے تالا لگا دیا۔کمرے سے بدبو آنے کی اطلاع ملنے کے بعد 2 اکتوبر 2026 کو پولیس نے تالا توڑ کر لاش برآمد کی۔ شکایت کنندہ سورج شاستری کے بیان کی بنیاد پر ناندیڑ دیہی پولیس تھانے میں مقدمہ نمبر 1283/2026 درج کیا گیا۔ ملزم کے خلاف بھارتیہ نیائے سنہتا کی دفعات 103(1)، 351(2) اور 351(3) کے تحت کارروائی کی گئی ہے۔بند کمرے سے بدبو آنے کی اطلاع ملتے ہی سینئر پولیس افسران، ناندیڑ دیہی پولیس تھانے کے انچارج افسر اور جرائم تفتیشی دستے نے فوری طور پر موقع پر پہنچ کر پنچوں کی موجودگی میں کمرے کا تالا توڑا اور سڑی ہوئی حالت میں موجود لاش کو قبضے میں لے کر پنچ نامہ کیا۔ شکایت کنندہ کے بیان پر فوری طور پر قتل کا مقدمہ درج کیا گیا۔
مقدمہ درج ہوتے ہی ملزم کی تلاش کے لیے ناندیڑ کے پولیس سپرنٹنڈنٹ ڈاکٹر نیلاب روہن کے حکم پر مختلف ٹیمیں تشکیل دے کر تلاش مہم شروع کی گئی۔ ملزم کا تعلق پنجاب سے ہونے کی وجہ سے وہ ریاست سے فرار ہونے کی تیاری میں تھا، تاہم پولیس نے خفیہ اطلاع اور تکنیکی معلومات کی مدد سے چند ہی گھنٹوں میں کارروائی کرتے ہوئے داراسنگھ گرونام سنگھ (عمر 51 سال، ساکن دھون دھئی والا، تعلقہ ترن، ضلع ترن تارن، پنجاب، حال مقیم وشنو پوری، ناندیڑ) کو گرفتار کرلیا۔ملزم کے خلاف گرفتاری کی مزید کارروائی جاری ہے جبکہ معاملے کی مزید تفتیش اسسٹنٹ پولیس سب انسپکٹر کپل پاٹل کررہے ہیں۔
یہ کارروائی ناندیڑ کے پولیس سپرنٹنڈنٹ ڈاکٹر نیلاب روہن کے احکامات پر ایڈیشنل پولیس سپرنٹنڈنٹ محترمہ ارچنا پاٹل اور سورج گورَو، نیز اتوارہ کے پولیس سب ڈویژنل افسر پرشانت شندے کی رہنمائی میں انجام دی گئی۔ ناندیڑ دیہی پولیس تھانے کے پولیس انسپکٹر اوم کانت چنچولکر، پولیس سب انسپکٹر وینکٹ کُسمے، سنیل بھسے، بابوراؤ چوہان اور ان کی ٹیم کے اہلکاروں مادھو مارواڑے، لکشمن جادھو، مالگے، شیخ، کامبلے، وٹھل بھسے، کلیانکر، پوار، شیخ غفار، جیون تلنگ، بھگوان، ٹِپر سے، سنتوش جادھو، بنگئی، کوادے اور سائبر سیل کے راجندر سِٹیکر نے کارروائی میں حصہ لیا۔