بی جے پی حکمراں ریاستوں میں ایک ایک کر یکساں سول کوڈ نافذ کیے جانے کی کوششیں تیز ہوتی جا رہی ہیں۔ کچھ ریاستوں کی اسمبلیوں میں یو سی سی بل پیش کیا جا چکا ہے، اور کچھ میں پیش کیے جانے کی تیاری ہے۔ اتراکھنڈ میں تو یو سی سی نافذ بھی ہو چکا ہے، اور اب مدھیہ پردیش کی بی جے پی حکومت اس کے نفاذ کو یقینی بنانا چاہتی ہے۔
مدھیہ پردیش کے وزیر اعلیٰ موہن یادو نے یکساں سول کوڈ سے متعلق ایک اہم تبصرہ کرتے ہوئے کہا کہ ’’بھگوان مہاکال نے چاہا تو اسمبلی کے اسی اجلاس میں یکساں سول کوڈ پاس ہوگا۔‘‘ اسی کے ساتھ انھوں نے نیٹ امتحان سے متعلق سبھی انتظامات پر خصوصی طور سے توجہ دینے کی بات بھی کہی ہے۔ حالانکہ یکساں سول کوڈ سے متعلق دیے گئے ان کے بیان کو لوگ بہت اہم تصور کر رہے ہیں۔
وزیر اعلیٰ موہن یادو آج اسمبلی پہنچے اور سب سے پہلے انھوں نے سابق وزیر اعلیٰ کیلاش ناتھ کاٹجو کے یوم پیدائش پر انھیں یاد کیا۔ کیلاش ناتھ کی تصویر پر انھوں نے عقیدت کا پھول بھی پیش کیا۔ اسی دوران انھوں نے یکساں سول کوڈ کے بارے میں اپنا نظریہ میڈیا کے سامنے رکھا۔ انھوں نے بتایا کہ اسمبلی کے اسی اجلاس میں یکساں سول کوڈ بل پیش ہوگا۔ اس کے علاوہ اسمبلی اجلاس میں حکومت کئی اہم اور موجودہ حالات پر مبنی ایشوز بھی لے کر آ رہی ہے۔ انھوں نے اپنے بیان میں واضح لفظوں میں کہا کہ ’’بابا مہاکال کے کرم سے یو سی سی بل اسی اجلاس میں ضرور پاس ہوگا۔‘‘
ہندوستان نے افغانستان کو بھیجی 5 ٹن ضروری ادویات کی کھیپ، انسانی امداد کے عزم کا اعادہ
ہندوستان نے افغانستان کو ضروری ادویات بھیج کر افغان عوام کی فلاح اور انسانی امداد کے لیے اپنی مسلسل وابستگی کا اعادہ کیا۔ وزارتِ خارجہ نے کہا کہ یہ امداد شعبہ صحت کی ضروریات پوری کرنے میں مددگار ہوگی