نوئیڈا کے سیکٹر 25 کے پاس دو لوگوں کی پٹائی کا ایک ویڈیو وائرل ہو رہا ہے جو کافی اذیت ناک ہے۔ ویڈیو میں دکھائی پڑتا ہے کہ تپتی دھوپ میں دو لوگوں کو بے لباس کر کے بجلی کے کھمبے سے باندھ دیا جاتا ہے اور پھر اس کی بے رحمی سے پٹائی کی جاتی ہے۔ بتایا جا رہا ہے کہ ان دونوں پر چوری کرنے کا شبہ تھا اس لیے لوگ بری طرح ان کی پٹائی کر رہے تھے۔ ویڈیو وائرل ہونے کے بعد تھانہ سیکٹر 20 کی پولس نے نامعلوم لوگوں کے خلاف معاملہ درج کر لیا ہے اور ان کی تلاشی شروع کر دی ہے۔
وائرل ویڈیو کے تعلق سے نوئیڈا تھانہ سیکٹر 20 کے انسپکٹر انچارج نے بتایا کہ جمعہ کو سوشل میڈیا پر ایک ویڈیو وائرل ہوا ہے جس میں سیکٹر 25 کے پاس تپتی دھوپ میں بجلی کے کھمبے سے دو نوجوانوں کو بے لباس کر کے باندھا گیا اور پھر ان کی پٹائی کی گئی۔ سوشل میڈیا پر وائرل اس ویڈیو کی جانچ کی گئی اور اسے درست پایا گیا۔ تھانہ انچارج نے بتایا کہ دو دن قبل سیکٹر 25 واقع ایک آٹو اسٹینڈ کے پاس یہ واقعہ پیش آیا۔
ASP Gautam Buddha Nagar, Dr. Kaustubh: A video has gone viral in which two men can be seen tied to a poll and being beaten up by some people. People who had tied the men have been identified and a case has been registered. Further investigation underway. pic.twitter.com/AXW57gO4cT
— ANI UP (@ANINewsUP) June 1, 2019
تھانہ انچارج کے مطابق جانچ کے بعد پتہ چلا کہ آٹو اسٹینڈ سے کچھ آٹو رکشہ سے بیٹری چوری ہو گئی تھی اور جب جمعرات کی دوپہر کو جب آٹو رکشہ مالکوں نے دو لوگوں کو اوزار ہاتھ میں لیے ہوئے دیکھا تو انھیں شک ہوا اور اسی شک کی بنیاد پر دونوں افراد کو پکڑ لیا۔ آٹو رکشہ سے بیٹری چوری ہونے سے ناراض کچھ آٹو ڈرائیوروں نے ان دونوں کے کپڑے اتار کر تیز دھوپ میں انھیں بجلی کے کھمبے سے باندھا اور پھر ان کی پٹائی شروع کر دی۔
پورا واقعہ سامنے آنے کے بعد پولس معاملے کی جانچ میں جٹ گئی ہے اور یرغمال بنا کر پیٹے گئے دونوں نوجوان کی شناخت کی بھی کوشش کی جا رہی ہے۔ پولس ان آٹو ڈرائیوروں کی بھی تلاش کر رہی ہے جنھوں نے اس واقعہ کو انجام دیا۔
– Source بشکریہ قومی آواز بیورو—