ممبئی: اداکار سیف علی خان پر حملے کے بعد انہیں لیلاوتی اسپتال میں داخل کرانے والے رکشہ ڈرائیور بھجن سنگھ رانا کو سوشل میڈیا انفلوئنسر فیضان انصاری نے اعزاز سے نوازا اور مالی مدد کی۔ رکشہ ڈرائیور نے آئی این ایس سے بات کرتے ہوئے کہا کہ اچھا کام کرنے پر اسے فخر محسوس ہوتا ہے۔
سوشل میڈیا انفلوئنسر فیضان انصاری نے رکشہ ڈرائیور بھجن سنگھ رانا کو اعزاز سے نوازتے ہوئے 11 ہزار روپے انعام دیا۔
بھجن سنگھ رانا نے کہا کہ میں نے کبھی سوچا بھی نہیں تھا کہ زندگی میں ایسا کچھ ہوگا، مجھے اپنے آپ پر بہت فخر محسوس ہو رہا ہے۔ آج اعزاز ملنے پر بہت اچھا لگ رہا ہے۔ مجھے اچھا لگتا ہے کہ میں نے کسی کی مدد کی۔ جب لوگ خون میں لت پت شخص کو دیکھتے ہیں تو ڈر جاتے ہیں، مجھے بھی ایک لمحے کے لیے خوف محسوس ہوا۔
اس وجہ سے میں نے سوچا کہ کہیں میں کسی پولیس کیس میں نہ پھنس جاؤں۔ لیکن اس کے بعد میں نے مدد کرنے کا سوچا اور آگے بڑھا۔ یہ بات مجھے بہت خوشی دیتی ہے۔