ناندیڑ ضلع میں ایس آئی آر پروگرام کے تحت مسودہ ووٹر لسٹ جاری,

ناندیڑ (ورق تازہ نیوز)، 31 اگست: الیکشن کمیشن آف انڈیا کی ہدایات کے مطابق پورے مہاراشٹر کے ساتھ ناندیڑ ضلع میں بھی یکم اکتوبر 2026 کو اہلیت کی تاریخ قرار دیتے ہوئے خصوصی گہری نظرثانی Sir aپروگرام چلایا جا رہا ہے۔ اس پروگرام کے تحت آج 31 اگست 2026 کو ضلع کے تمام اسمبلی حلقوں کی مسودہ ووٹر لسٹ جاری کر دی گئی ہے۔مسودہ ووٹر لسٹ تمام تحصیل دفاتر، سب ڈویژنل افسران کے دفاتر اور متعلقہ پولنگ مراکز پر عوام کے معائنے کے لیے دستیاب کرائی گئی ہے۔ اس کے علاوہ مسودہ ووٹر لسٹ کے ساتھ غیر حاضر، منتقل شدہ، فوت شدہ اور دوہری ووٹنگ اندراج رکھنے والے ووٹرز کی فہرست ضلع کی سرکاری ویب سائٹ nanded.nic.in پر بھی جاری کی گئی ہے۔

30 ستمبر تک دعوے اور اعتراضات درج کرانے کی مہلت

مسودہ ووٹر لسٹ کی اشاعت 31 اگست 2026 کو کی گئی ہے، جبکہ دعوے اور اعتراضات درج کرانے کی مدت 31 اگست سے 30 ستمبر 2026 تک مقرر کی گئی ہے۔ دعووں اور اعتراضات پر سماعت کے بعد ان کا فیصلہ 29 اکتوبر 2026 تک کیا جائے گا، جبکہ حتمی ووٹر لسٹ 4 نومبر 2026 کو جاری کی جائے گی۔

ووٹرز اپنے نام ووٹر لسٹ میں ضرور چیک کریں

ضلع کے تمام ووٹرز مسودہ ووٹر لسٹ میں اپنا نام، پتہ اور دیگر تفصیلات درست ہونے کی تصدیق کریں۔ ووٹر اپنا نام الیکشن کمیشن آف انڈیا کے ووٹر سروس پورٹل، چیف الیکشن آفیسر مہاراشٹر کی ویب سائٹ voters.eci.gov.in یا ceo.maharashtra.gov.in پر آن لائن چیک کر سکتے ہیں۔ اس کے علاوہ متعلقہ بوتھ لیول آفیسر (BLO)، تحصیل دفتر یا ووٹر رجسٹریشن افسر کے دفتر میں بھی ووٹر لسٹ کا معائنہ کیا جا سکتا ہے۔

نئے ووٹرز کے لیے خصوصی موقع

جن شہریوں کی عمر یکم اکتوبر 2026 کو یا اس سے پہلے 18 سال مکمل ہو رہی ہے، وہ نئے ووٹر کے طور پر رجسٹریشن کے اہل ہوں گے۔ اہل شہری فارم نمبر 6، حلف نامے اور ضروری دستاویزات کے ساتھ جمع کرا سکتے ہیں۔

ووٹرز کے لیے مختلف فارم مقرر کیے گئے ہیں۔ فارم نمبر 6 نئے ووٹر کی رجسٹریشن کے لیے، فارم نمبر 6A بیرون ملک مقیم بھارتی ووٹرز کی رجسٹریشن کے لیے، فارم نمبر 7 ووٹر لسٹ میں کسی نام پر اعتراض یا نام حذف کرنے کے لیے، جبکہ فارم نمبر 8 نام، عمر، پتہ وغیرہ میں تصحیح، معذوری کی نشاندہی یا ووٹر کا نام دوسرے مقام پر منتقل کرنے کے لیے استعمال کیا جا سکتا ہے۔

نوٹس موصول ہونے والے ووٹرز ضروری دستاویزات کے ساتھ سماعت میں حاضر ہوں

ووٹر لسٹ میں نام، عمر یا دیگر تفصیلات میں تضاد یا ان میپنگ کے سلسلے میں ووٹر رجسٹریشن افسران کی جانب سے نوٹس موصول ہونے والے ووٹرز سماعت کے وقت اپنی تاریخ پیدائش اور جائے پیدائش ثابت کرنے کے لیے ضروری دستاویزات ساتھ لائیں۔

یکم جولائی 1987 سے قبل بھارت میں پیدا ہونے والے افراد کو اپنی تاریخ پیدائش یا جائے پیدائش ثابت کرنے والی ضروری دستاویزات پیش کرنا ہوں گی۔

یکم جولائی 1987 سے 2 دسمبر 2004 کے درمیان بھارت میں پیدا ہونے والے افراد کو اپنی دستاویزات کے ساتھ والد یا والدہ کی تاریخ پیدائش اور جائے پیدائش ثابت کرنے والی ضروری دستاویزات بھی پیش کرنا ہوں گی۔

2 دسمبر 2004 کے بعد بھارت میں پیدا ہونے والے افراد کو اپنی دستاویزات کے ساتھ والد اور والدہ دونوں کی ضروری دستاویزات پیش کرنا ہوں گی۔

اگر والدین میں سے کوئی بھی بھارتی شہری نہیں ہے تو ووٹر کی پیدائش کے وقت متعلقہ شخص کے درست پاسپورٹ اور ویزا کی نقل پیش کرنا ضروری ہوگی۔ اگر پیدائش بھارت سے باہر ہوئی ہو تو بیرون ملک موجود بھارتی سفارت خانے یا مشن کی جانب سے جاری کردہ پیدائش کے اندراج کا ثبوت پیش کرنا ہوگا۔ اسی طرح رجسٹریشن یا شہریت حاصل کرنے کے ذریعے بھارتی شہری بننے والے افراد کو شہریت رجسٹریشن سرٹیفکیٹ کی نقل پیش کرنا ہوگی۔

قابل قبول دستاویزات میں مختلف سرکاری ثبوت شامل

تاریخ پیدائش اور جائے پیدائش ثابت کرنے کے لیے قابل قبول دستاویزات کی اشارتی اور غیر جامع فہرست میں مرکزی و ریاستی حکومتوں اور سرکاری شعبے کے اداروں کے ملازمین یا پنشن یافتگان کو جاری کردہ شناختی کارڈ یا پنشن پیمنٹ آرڈر، حکومت یا مقامی اداروں، بینکوں، محکمہ ڈاک، ایل آئی سی اور سرکاری شعبے کے اداروں کی جانب سے بھارت میں یکم جولائی 1987 سے قبل جاری کردہ شناختی کارڈ یا دستاویزات، مجاز اتھارٹی کا پیدائش سرٹیفکیٹ، پاسپورٹ، تسلیم شدہ بورڈ یا یونیورسٹی کا میٹرک یا تعلیمی سرٹیفکیٹ، مستقل رہائش کا سرٹیفکیٹ، فارسٹ رائٹس سرٹیفکیٹ، دیگر پسماندہ طبقات (OBC)، درج فہرست ذات (SC)، درج فہرست قبائل (ST) یا دیگر ذات کا سرٹیفکیٹ، جہاں قابل اطلاق ہو قومی شہری رجسٹر، سرکاری افسران کی جانب سے محفوظ خاندانی رجسٹر اور حکومت کی جانب سے جاری کردہ زمین یا مکان الاٹمنٹ سرٹیفکیٹ وغیرہ شامل ہیں۔

آدھار سے متعلق الیکشن کمیشن آف انڈیا کے خط نمبر 23/2025-ERS/Vol. II مورخہ 9 ستمبر 2025 (ضمیمہ-II) کے تحت جاری کردہ ہدایات نافذ رہیں گی۔

اہل شہری جمہوری عمل میں فعال طور پر حصہ لیں

ضلع کلکٹر راہل کردیڑے نے ضلع کے شہریوں سے اپیل کی ہے کہ ’’جمہوریت کو مضبوط بنانے کے لیے ہر اہل شہری کا نام ووٹر لسٹ میں شامل ہونا انتہائی ضروری ہے۔ ناندیڑ ضلع کے تمام شہری، خصوصاً نوجوان نئے ووٹرز، اس مہم سے فائدہ اٹھائیں اور اس بات کو یقینی بنائیں کہ اپنے خاندان اور علاقے کے تمام اہل ووٹرز کے نام مسودہ ووٹر لسٹ میں شامل ہیں۔‘‘

انہوں نے مزید کہا کہ اگر غلطی سے کسی اہل ووٹر کا نام ووٹر لسٹ سے رہ گیا ہو تو فارم نمبر 6، حلف نامے اور ضروری دستاویزات کے ساتھ جمع کرایا جائے۔ کسی بھی قسم کی غلطی یا نام حذف ہونے کی صورت میں 30 ستمبر 2026 سے قبل متعلقہ بی ایل او یا آن لائن پورٹل کے ذریعے دعوے اور اعتراضات درج کرائے جائیں۔

ووٹر لسٹ سے متعلق سماعت میں ووٹر رجسٹریشن افسر کے فیصلے کے خلاف ضلع انتخابی افسر کے پاس اپیل کی جا سکتی ہے۔ اسی طرح ضلع انتخابی افسر کے فیصلے کے خلاف چیف الیکشن آفیسر، مہاراشٹر کے پاس اپیل کی جا سکتی ہے، یہ اطلاع بھی ضلع کلکٹر راہل کردیڑے نے دی ہے۔