ممبئی:مہاراشٹر حکومت کی ’مکھیہ منتری ماجھی لَاڈکی بہن یوجنا‘ سے وابستہ خواتین کے لیے بڑی خبر سامنے آ رہی ہے۔ اس اسکیم کے تحت مستحق خواتین کو ہر ماہ 1500 روپے کی مالی امداد دی جاتی ہے۔ اب خواتین کو اگست کے قسط کی رقم کا انتظار ہے۔
ذرائع کے مطابق حکومت کی جانب سے اگست کی قسط کی رقم تہوار کے موقع پر خواتین کے بینک اکاؤنٹس میں براہِ راست جمع کرانے کی تیاری کی جا رہی ہے۔ بتایا جا رہا ہے کہ گنیش اتسو کے دوران، خصوصاً گوری آمد کے موقع پر خواتین کے اکاؤنٹس میں رقم جمع ہونے کا امکان ہے۔
تاہم، گوری آمد کے دن ہی رقم جمع ہوگی، اس سلسلے میں حکومت کی جانب سے ابھی تک کوئی باضابطہ اعلان نہیں کیا گیا ہے۔ اس لیے خواتین کو سرکاری اعلان کا انتظار کرنا ہوگا۔
اسکیم کے تحت اہل خواتین کو ہر ماہ 1500 روپے کی رقم براہِ راست بینک اکاؤنٹ میں DBT کے ذریعے منتقل کی جاتی ہے۔ حالیہ مہینوں میں قسطوں کی ادائیگی میں تاخیر کے باعث خواتین میں بے چینی دیکھی جا رہی ہے۔
دوسری جانب، اسکیم میں ای-کے وائی سی اور مستحقین کی جانچ کا عمل بھی جاری ہے۔ جن خواتین کی اہلیت برقرار ہے اور جنہوں نے ضروری کارروائی مکمل کرلی ہے، انہیں آئندہ قسط کا فائدہ ملنے کی توقع ہے۔
واضح رہے کہ سوشل میڈیا اور مختلف رپورٹس میں قسط کی رقم اور تاریخ کے حوالے سے مختلف دعوے کیے جا رہے ہیں، لیکن جب تک حکومت کی جانب سے باضابطہ تاریخ جاری نہیں ہوتی، ان دعوؤں کو حتمی نہیں سمجھا جا سکتا۔
لہٰذا لَاڈکی بہن یوجنا کی مستحق خواتین کو مشورہ دیا گیا ہے کہ وہ اپنے بینک اکاؤنٹ، آدھار لنکنگ اور ای-کے وائی سی کی حیثیت ضرور چیک رکھیں۔