رکشہ-ٹیکسی ڈرائیوروں کی من مانی بند ہوگی
غیر قانونی کرایہ وصولی اور بدتمیزی پر واٹس ایپ شکایتی نمبر جاری ہوگا
ممبئی (آفتاب شیخ)
ممبئی میٹروپولیٹن ڈیولپمنٹ اتھارٹی کے تحت چلنے والے رکشہ، ٹیکسی اور اولا-اوبر ڈرائیوروں کی من مانی کے خلاف حکومت نے سخت قدم اٹھانے کا فیصلہ کیا ہے۔ وزیر ٹرانسپورٹ پرتاپ سرنائیک نے اعلان کیا ہے کہ ایسے ڈرائیور جو مسافروں سے غیر قانونی کرایہ وصول کرتے ہیں، بدتمیزی کرتے ہیں یا کرایہ پر لے جانے سے انکار کرتے ہیں، ان کے خلاف فوری شکایت درج کرنے کے لیے ایک نیا واٹس ایپ نمبر فراہم کیا جائے گا۔
پرتاپ سرنائیک باندرہ ایسٹ کے ریلوے اسٹیشنز کے باہر رکشہ اور ٹیکسی ڈرائیوروں کے غیر قانونی رویے پر منعقدہ میٹنگ میں خطاب کر رہے تھے۔ اس موقع پر باندرہ ایسٹ کے رکن اسمبلی ورون سردیسائی، محکمہ موٹر ٹرانسپورٹ کے اعلیٰ افسران اور دیگر حکام موجود تھے۔
ایم ایل اے ورون سردیسائی نے شکایت کی کہ باندرہ، کھار اور اندھیری ریلوے اسٹیشن کے باہر مسافروں کو رکشہ اور ٹیکسی ڈرائیوروں کے ہراسانی کا سامنا کرنا پڑتا ہے۔ وہ کرایہ کے معاملے میں من مانی کرتے ہیں اور بعض اوقات مسافروں کو ان کی مطلوبہ منزل پر لے جانے سے بھی انکار کر دیتے ہیں۔ انہوں نے محکمہ ٹرانسپورٹ سے فوری سخت اقدامات کرنے کا مطالبہ کیا۔
وزیر پرتاپ سرنائیک نے یقین دلایا کہ موٹر ٹرانسپورٹ ڈیپارٹمنٹ اور ٹریفک پولیس کی ایک مشترکہ ٹیم تشکیل دی جائے گی، جو ایسے علاقوں کا دورہ کرے گی جہاں رکشہ اور ٹیکسی ڈرائیوروں کی شکایات زیادہ ہیں۔ فی الحال، اندھیری علاقائی ڈویژن کے لیے واٹس ایپ نمبر 9920240202 جاری کیا گیا ہے، لیکن اب پورے ممبئی میٹروپولیٹن علاقے کے لیے ایک ہی واٹس ایپ ہیلپ لائن نمبر جاری کیا جائے گا، جس کا اعلان ایک ہفتے میں متوقع ہے۔
وزیر ٹرانسپورٹ نے ہدایت دی کہ محکمہ ٹرانسپورٹ موصول ہونے والی شکایات پر فوری کارروائی کرے، متعلقہ ڈرائیوروں کو نوٹس جاری کرے اور سنگین شکایات کی صورت میں ان کا لائسنس منسوخ کرنے کی کارروائی کرے۔
