تھانے کلکٹریٹ میں پونے کے 3,662 فلیٹوں کی قرعہ اندازی کا شفاف عمل مکمل
نائب وزیر اعلیٰ ایکناتھ شندے کی موجودگی میں تقریب، مستحقین کے چہرے خوشی سے روشن
تھانے (آفتاب شیخ)
مہاراشٹر کے نائب وزیر اعلیٰ ایکناتھ شندے کی موجودگی میں تھانے ڈسٹرکٹ کلکٹریٹ کے کمیٹی ہال میں پونے ہاؤسنگ ایریا ڈیولپمنٹ بورڈ کی جانب سے 3,662 فلیٹوں کی کمپیوٹرائزڈ لاٹری کا عمل مکمل کیا گیا۔ یہ قرعہ اندازی ویڈیو کانفرنسنگ کے ذریعے منعقد کی گئی، جس میں بڑی تعداد میں درخواست دہندگان نے شرکت کی۔
اس موقع پر پونے ہاؤسنگ ایریا ڈیولپمنٹ بورڈ کے چیئرمین شیواجی راؤ آدھل راؤ پاٹل، مہاڈا کے وائس چیئرمین اور سی ای او سنجیو جیسوال، تھانے کے ضلع کلکٹر اشوک شنگارے، تھانے میونسپل کمشنر سوربھ راؤ اور تھانے ضلع پریشد کے سی ای او روہن گھوگے موجود تھے۔
تقریب سے خطاب کرتے ہوئے نائب وزیر اعلیٰ ایکناتھ شندے نے کہا کہ حکومت سستے اور معیاری مکانات کی فراہمی کو ترجیح دے رہی ہے تاکہ عام شہریوں کو بہتر رہائشی سہولیات فراہم کی جا سکیں۔ انہوں نے مہاڈا (MHADA) کی اسکیموں کو شفاف اور مستحقین کے حق میں فائدہ مند قرار دیا اور کہا کہ کمپیوٹرائزڈ قرعہ اندازی کے ذریعے بدعنوانی کا مکمل خاتمہ ممکن ہوا ہے۔
مہاڈا کے نائب صدر سنجیو جیسوال نے کہا کہ قرعہ اندازی شفاف اور مکمل ڈیجیٹل عمل کے تحت ہوئی ہے، جس میں بدعنوانی یا بے قاعدگیوں کی کوئی گنجائش نہیں۔ انہوں نے مزید کہا کہ فلیٹس کی الاٹمنٹ مقررہ اصولوں کے مطابق کی جا رہی ہے تاکہ ہر مستحق کو اس کا حق مل سکے۔
ضلع کلکٹر اشوک شنگارے نے اس اقدام کو تھانے اور پونے جیسے شہری علاقوں میں سستی ہاؤسنگ اسکیموں کے فروغ کے لیے ایک اہم پیش رفت قرار دیا۔
تقریب میں موجود عہدیداروں اور اسٹیک ہولڈروں نے حکومت کی رہائشی اسکیموں کو سراہا، جبکہ مستحقین کے چہروں پر مسرت نمایاں تھی کیونکہ یہ اسکیم ان کے لیے اپنا گھر حاصل کرنے کا خواب پورا کرنے کا ایک سنہری موقع لے کر آئی ہے۔
