ناندیڑ (ورق تازہ نیوز) شہر میں جرائم کی بڑھتی وارداتوں نے ایک بار پھر شہریوں کی تشویش میں اضافہ کر دیا ہے۔ آج صبح پیش آئے قتل کے واقعے کی گونج ابھی تھمی بھی نہیں تھی کہ دوپہر تک ایک اور نوجوان کے قتل کی دل دہلا دینے والی واردات سامنے آگئی۔
اطلاعات کے مطابق سڈکو علاقے میں دودھ ڈیری کے قریب، دھنے گاؤں کر پٹرول پمپ پر آج دوپہر تقریباً 12 بجے چند افراد نے ایک نوجوان پر مہلک ہتھیاروں سے حملہ کر دیا۔ اس حملے میں چندن سنگھ باوری نامی نوجوان موقع پر ہی جاں بحق ہو گیا۔
واقعے کی اطلاع ملتے ہی پولیس فوری طور پر جائے وقوعہ پر پہنچ گئی اور علاقے کا معائنہ کرنے کے بعد تفتیش کا آغاز کر دیا۔ حملہ آور کتنے تھے، انہوں نے کون سے ہتھیار استعمال کیے، اور اس قتل کے پیچھے اصل وجہ کیا تھی، ان تمام پہلوؤں کی تحقیقات جاری ہیں۔
ادھر جائے وقوعہ پر موجود بعض شہریوں کے مطابق یہ واقعہ ممکنہ طور پر گینگ وار کا حصہ ہو سکتا ہے۔ یہ بھی دعویٰ کیا جا رہا ہے کہ حملہ آور کسی جرائم پیشہ گروہ سے وابستہ ہو سکتے ہیں، تاہم پولیس نے ان دعوؤں کی ابھی تک کوئی سرکاری تصدیق نہیں کی ہے۔
پولیس مختلف زاویوں سے معاملے کی جانچ کر رہی ہے اور ابتدائی تحقیقات کی بنیاد پر مزید معلومات سامنے آنے کی توقع ہے۔