ایس ٹی افسران کا تین سالہ تبادلہ یقینی بنایا جائے
وزیر ٹرانسپورٹ پرتاپ سارنائیک کی ہدایت، ورکرز یونین کے اجلاس میں اہم فیصلے
(آفتاب شیخ)
ایس ٹی کارپوریشن میں طویل عرصے سے ایک ہی ہیڈکوارٹر میں تعینات افسران کے فوری تبادلے کا حکم جاری کیا گیا ہے۔ وزیر ٹرانسپورٹ پرتاپ سارنائیک نے ہدایت دی ہے کہ تین سال سے زائد مدت سے ایک ہی مقام پر خدمات انجام دینے والے افسران کو دوسری جگہوں پر تعینات کیا جائے تاکہ شفافیت اور منصفانہ نظام کو یقینی بنایا جا سکے۔
یہ فیصلہ ایم ایل اے گوپی چند پڈلکر اور ایم ایل اے سدابھاؤ کھوت کی قیادت میں ورکرز یونین کے ایک اجلاس میں کیا گیا، جس میں ایس ٹی کارپوریشن کے وائس چیئرمین و منیجنگ ڈائریکٹر وویک بھیمنوار سمیت سینئر افسران اور ملازمین بھی موجود تھے۔
ایم ایل اے گوپی چند پڈلکر نے نشاندہی کی کہ کئی افسران برسوں سے ایک ہی ہیڈکوارٹر میں تعینات ہیں، جس کی وجہ سے وہ مخصوص ملازمین کے ساتھ ذاتی مفادات کو فروغ دیتے ہیں، اور دیگر ملازمین کے ساتھ ناانصافی ہوتی ہے۔ اس کے نتیجے میں ایس ٹی کارپوریشن کی کارکردگی بھی متاثر ہو رہی ہے۔ انہوں نے تجویز دی کہ مستقبل میں کسی بھی افسر کو تین سال سے زیادہ ایک ہی ہیڈکوارٹر میں تعینات نہ رکھا جائے۔
وزیر سارنائیک نے اس مطالبے کی حمایت کرتے ہوئے ایس ٹی انتظامیہ کو فوری کارروائی کی ہدایت دی۔ اجلاس میں ملازمین کے مالی مسائل پر بھی تفصیلی گفتگو ہوئی، اور وزیر نے یقین دہانی کرائی کہ سیشن کے اختتام کے بعد وزیر اعلیٰ اور دونوں نائب وزرائے اعلیٰ سے تبادلہ خیال کیا جائے گا تاکہ ملازمین کو ان کے حقوق دلوائے جا سکیں۔
دریں اثنا، وزیر سارنائیک نے سنگمنیر (ضلع احمد نگر) کے بس اسٹینڈ کے مسائل پر بھی ایم ایل سی ستیہ جیت تامبے اور امول کھتال کے ایک وفد سے گفتگو کی۔ اس دوران چھترپتی شیواجی مہاراج کی یادگار کے لیے جگہ فراہم کرنے اور ناسک-پونے ہائی وے پر چلنے والی بسوں کو سنگمنیر بس اسٹینڈ پر روکنے جیسے امور پر تبادلہ خیال کیا گیا۔
