ووٹر لسٹ گھوٹالے پر کانگریس کا ریاست گیر مہم کا اعلان
ووٹر لسٹ فراہم کرنے میں الیکشن کمیشن کو چھ ماہ کیوں لگتے ہیں؟: گوردیپ سنگھ سپل
لوک سبھا انتخابات کے بعد 40 لاکھ ووٹر کیسے بڑھ گئے؟: پروین چکرورتی
پونے جنسی زیادتی کیس پر وزیر مملکت برائے داخلہ کا غیر شائستہ اور بیمار ذہنیت پر مبنی بیان، فوری برطرفی کا مطالبہ
ممبئی: مہاراشٹر اسمبلی انتخابات میں ووٹر لسٹ میں بڑے پیمانے پر گھوٹالہ کر کے بی جے پی اتحاد نے الیکشن کمیشن کے ذریعے جیت حاصل کی ہے۔ اس گھوٹالے کی تحقیقات کا مطالبہ کانگریس پارٹی نے کیا تھا، لیکن مرکزی حکومت اور الیکشن کمیشن جان بوجھ کر اس معاملے کو نظر انداز کر رہے ہیں۔ پہلے ایکناتھ شندے کی قیادت میں غیر آئینی حکومت قائم کی گئی تھی، اور اس کے بعد اسمبلی میں ووٹوں کی چوری کے ذریعے بی جے پی اتحاد نے اقتدار حاصل کیا۔ کانگریس پارٹی نے اس ووٹر لسٹ گھوٹالے کو عوام تک پہنچانے کے لیے ایک ریاست گیر بیداری مہم شروع کرنے کا فیصلہ کیا ہے۔ یہ اطلاع مہاراشٹر پردیش کانگریس کمیٹی کے صدر ہرش وردھن سپکال نے دی۔
تلک بھون میں اس ضمن میں ایک میٹنگ منعقد ہوئی، جس میں کانگریس کے ریاستی صدر ہرش وردھن سپکال، کانگریس ورکنگ کمیٹی کے رکن گوردیپ سنگھ سپل، ڈیٹا اینالیسس اور پروفیشنل کانگریس کے صدر پروین چکرورتی، آل انڈیا کانگریس کمیٹی کے سیکریٹری بی ایم سندیپ اور ریاستی نائب صدر موہن جوشی سمیت 30 اسمبلی حلقوں کے نمائندوں نے شرکت کی۔ اجلاس کے بعد پریس کانفرنس سے خطاب کرتے ہوئے ہرش وردھن سپکال نے کہا کہ کانگریس وفد نے ووٹر لسٹ میں بے ضابطگیوں سے متعلق معلومات کے لیے الیکشن کمیشن سے درخواست کی تھی، لیکن کمیشن جان بوجھ کر معلومات فراہم کرنے میں ٹال مٹول کر رہا ہے۔ انہوں نے مزید کہا کہ اپوزیشن لیڈر راہل گاندھی نے پارلیمنٹ میں بھی اس معاملے کو اٹھایا تھا اور تحقیقات کا مطالبہ کیا تھا، لیکن حکومت اس معاملے سے راہ فرار اختیار کر رہی ہے۔ اسی لیے کانگریس پارٹی نے فیصلہ کیا ہے کہ اب اس مسئلے کو عوام کے دربار میں لے جایا جائے گا۔
پریس کانفرنس میں بات کرتے ہوئے گوردیپ سنگھ سپل نے کہا کہ جب ووٹر لسٹ میں اضافے سے متعلق معلومات مانگی گئیں تو الیکشن کمیشن نے تین ماہ کا وقت طلب کیا تھا اور اب مزید تین ماہ کا وقت مانگا جا رہا ہے۔ وہ صرف یہ کہتے ہیں کہ نظام فول پروف ہے، لیکن حقائق فراہم نہیں کرتے۔ سپل نے سوال اٹھایا کہ جب الیکشن کمیشن کے پاس تمام معلومات موجود ہیں اور صرف کاپی پیسٹ کرنا ہے، تو پھر چھ ماہ کا وقت کیوں لگ رہا ہے؟
ڈیٹا اینالیسس ماہر پروین چکرورتی نے انکشاف کیا کہ مہاراشٹر میں اسمبلی اور لوک سبھا انتخابات کے درمیان صرف پانچ ماہ میں 40 لاکھ ووٹروں کا اضافہ ہوا، جو پچھلے پانچ سالوں میں ہونے والے اضافے سے زیادہ ہے۔ کئی اسمبلی حلقوں میں جعلی ووٹروں کے نام شامل کیے گئے۔ اسمبلی انتخابات میں بی جے پی اتحاد کو لوک سبھا انتخابات کے مقابلے میں 70 لاکھ اضافی ووٹ ملے، جبکہ مہاوکاس اگھاڑی کے ووٹوں میں کوئی خاص فرق نہیں تھا۔ انہوں نے کہا کہ یہ پورا معاملہ مشکوک ہے اور اس کی گہرائی سے تفتیش ہونی چاہیے۔
راہل گاندھی کے کمبھ میلے میں شرکت نہ کرنے پر ہونے والی تنقید پر جواب دیتے ہوئے گوردیپ سپل نے کہا کہ نریندر مودی گزشتہ 11 سال سے وزیر اعظم ہیں اور اس سے پہلے 12 سال تک گجرات کے وزیر اعلیٰ رہے، لیکن وہ کس کمبھ میلے میں گئے؟ اسی طرح امت شاہ بھی کسی کمبھ میلے میں نظر نہیں آئے، اور سنگھ کے سربراہ موہن بھاگوت بھی پرایاگ راج کے مہا کمبھ میں کیوں نہیں گئے؟ اگر راہل گاندھی پر سوال اٹھایا جاتا ہے تو ان پر کیوں نہیں؟
اسی دوران ریاستی صدر ہرش وردھن سپکال نے کہا کہ پونے کے سوار گیٹ بس اسٹیشن پر ایک نوجوان خاتون کے ساتھ جنسی زیادتی کا واقعہ انتہائی افسوسناک اور تشویشناک ہے۔ اس معاملے پر ریاستی وزیر داخلہ یوگیش قدم کا بیان نہ صرف غیر ذمہ دارانہ ہے بلکہ ایک بیمار ذہنیت کی عکاسی کرتا ہے۔ وزیر نے کہا کہ متاثرہ خاتون نے مزاحمت نہیں کی، تو کیا وہ مجرم کی حمایت کر رہے ہیں؟ سپکال نے مطالبہ کیا کہ ایسے وزیر سے صرف استعفیٰ نہیں بلکہ انہیں کابینہ سے برطرف کیا جانا چاہیے، لیکن موجودہ حکومت میں اخلاقیات باقی نہیں رہیں۔
