ممبئی (ورق تازہ نیوز)3۔اپریل: Bombay High Court نے مہاراشٹر میں مسلم کمیونٹی کو تعلیم میں دیے جانے والے 5 فیصد ریزرویشن کو ختم کرنے کے خلاف دائر عرضی پر ریاستی حکومت سے جواب طلب کر لیا ہے۔
عدالت کی ڈویژن بینچ، جسٹس ریاض چھاگلے (Riyaz Chagla )اور جسٹس Advait Sethna پر مشتمل تھی، جس نے ریاستی حکومت کو ہدایت دی کہ وہ اپریل کے وسط تک اپنا حلف نامہ داخل کرے۔ عدالت نے مزید کہا کہ درخواست گزار ایک ہفتے کے اندر جواب داخل کرے، جبکہ اس معاملے کی آئندہ سماعت 4 مئی کو ہوگی۔
عدالت نے درخواست گزار کو یہ بھی ہدایت دی کہ وہ متنازعہ سرکاری قرارداد (جی آر) اور دیگر متعلقہ دستاویزات کے ترجمہ شدہ نسخے آئندہ سماعت سے قبل پیش کرے۔
یہ عرضی ایڈووکیٹ Ejaz Naqvi کی جانب سے دائر کی گئی ہے، جس میں 17 فروری کو جاری ہونے والی مہاراشٹر حکومت کی اس قرارداد کو چیلنج کیا گیا ہے، جس کے ذریعے 2014 کے اس آرڈیننس کو واپس لے لیا گیا تھا جس میں مسلم کمیونٹی کی تقریباً 50 پسماندہ ذاتوں کو تعلیم میں 5 فیصد ریزرویشن دیا گیا تھا۔
درخواست گزار نے مؤقف اختیار کیا کہ اس فیصلے سے آئین میں دی گئی برابری اور مساوات کے اصولوں کی خلاف ورزی ہوئی ہے۔ ان کے مطابق حکومت کا یہ اقدام نہ صرف سماجی و تعلیمی طور پر پسماندہ طبقات بلکہ مسلم کمیونٹی کے مفادات کے بھی خلاف ہے۔
عرضی میں مزید کہا گیا ہے کہ 2014 میں اس وقت کی حکومت (کانگریس اور این سی پی) نے مراٹھا برادری کے لیے 16 فیصد اور مسلمانوں کے لیے 5 فیصد ریزرویشن دینے کا فیصلہ کیا تھا۔ بعد ازاں عدالت نے مسلمانوں کے ریزرویشن کو صرف تعلیم تک محدود رکھا تھا اور سرکاری ملازمتوں میں اس کا اطلاق نہیں ہونے دیا تھا۔
ایڈووکیٹ اعجاز نقوی کے مطابق، اس وقت سے لے کر اب تک مسلم کمیونٹی کی تقریباً 50 پسماندہ ذاتیں اس ریزرویشن سے فائدہ اٹھا رہی تھیں، اور اس کے خلاف کسی قسم کی شکایت بھی سامنے نہیں آئی۔
درخواست میں یہ بھی الزام عائد کیا گیا ہے کہ ریاستی حکومت نے بغیر کسی ٹھوس اور قابلِ پیمائش اعداد و شمار کے اس ریزرویشن کو ختم کرنے کا فیصلہ کیا، جو کہ غیر آئینی ہے۔اب اس اہم معاملے کی تفصیلی سماعت 4 مئی کو ہوگی، جس پر ریاست بھر میں گہری نظر رکھی جا رہی ہے۔