امت شاہ کے بیان سے بی جے پی کی آئین سازوں پر ناراضگی ظاہر: نانا پٹولے
ڈاکٹر باباصاحب امبیڈکر کی توہین پر امت شاہ کو قوم سے معافی مانگنی چاہیے
ناگپور: مرکزی وزیر داخلہ امت شاہ نے پارلیمنٹ میں ڈاکٹر باباصاحب امبیڈکر کے بارے میں جس انداز میں تبصرہ کیا، وہ نہایت قابل اعتراض ہے۔ امت شاہ نے کہا کہ ’امبیڈکر کا نام لینے کا ایک فیشن چل پڑا ہے۔ اگر اتنی مرتبہ بھگوان کا نام لیا جاتا تو وہ راضی ہو جاتا۔‘ اس بیان نے یہ واضح کر دیا کہ بی جے پی والوں کے دل میں ملک کے آئین سازوں کے لیے کس قدر ناراضگی ہے۔ امت شاہ کے اس بیان سے ڈاکٹر باباصاحب امبیڈکر کے بارے میں ان کا اصل چہرہ عوام کے سامنے آ گیا ہے۔ یہ بات مہاراشٹر پردیش کانگریس کمیٹی کے صدر نانا پٹولے نے کہی۔
مہاراشٹر اسمبلی کے احاطے میں میڈیا سے بات کرتے ہوئے نانا پٹولے نے کہا کہ کانگریس پارٹی ڈاکٹر باباصاحب امبیڈکر کے خلاف امت شاہ کے بیان کی سخت مذمت کرتی ہے۔ ڈاکٹر باباصاحب امبیڈکر نے سب کو جینے کا حق دیا، شخصی آزادی دی اور اسی کی بدولت ہم سب آج اپنے ملک میں عزت و وقار کے ساتھ رہ رہے ہیں۔ بی جے پی کے دل میں ڈاکٹر امبیڈکر کے لیے جو کڑواہٹ ہے، وہی امت شاہ کے الفاظ میں جھلک رہی ہے۔ نانا پٹولے نے مطالبہ کیا کہ ڈاکٹر امبیڈکر کی توہین کرنے پر امت شاہ کو قوم سے معافی مانگنی چاہیے۔
اپوزیشن لیڈر کے عہدے پر فیصلہ اسپیکر کریں گے
نانا پٹولے نے مزید کہا کہ مہاراشٹر میں اسمبلی اسپیکر اور قانون ساز کونسل کے چیئرمین کا انتخاب بلا مقابلہ کرنے کی روایت رہی ہے۔ اسمبلی کے نائب صدر اور کونسل کے نائب چیئرمین کے عہدے اپوزیشن کو دیے جاتے تھے، لیکن یہ روایت اب ختم ہو چکی ہے۔ اس معاملے پر وزیر اعلیٰ دیویندر فڑنویس سے بات چیت کی گئی ہے اور وہ اس پر مثبت رویہ رکھتے ہیں۔ انہوں نے کہا کہ شاہو، پھولے اور امبیڈکر کے مہاراشٹر میں اپوزیشن لیڈر کا ہونا ضروری ہے اور امید ہے کہ اسمبلی اسپیکر اس پر مناسب فیصلہ کریں گے۔