جمعیۃ علماء ہند کے کارکنان ومقامی ایم ایل اے نے سیلاب زدہ بیوہ خاتون کے مکان کا سنگ بنیاد،
کوچین :14 ؍ اکتوبر(پریس نوٹ)پیغمبر دو عالم ﷺ نے فرمایا ساری مخلوق اللہ کی عیال ہے چنانچہ جو لوگ اللہ کے عیال کی خدمت کرتے ہیں اللہ ان پر اپنی عنایتیں نازل کرتا ہے ۔ فرائض زندگی کے بعد خدمت خلق بہترین اور بڑی عبادت ہے۔اسے عبادت سمجھ کر رضاء الٰہی کی خاطرکرنا چاہئے ۔مصیبت زدہ انسانوں کے لئے خدمات کا دائرہ بہت وسیع ہوتا ہے ۔کیرالا میں سیلاب کی مصیبت سے لاکھوں انسان پریشان ہوئے ان کی امداد کے لئے درد مندافراد کھڑے ہوئے اور اعانت کا کام انجام دیا ۔جمعیۃ علماء ہند ہندوستانی مسلمانوںکی قدیم خدمت گذار جماعت ہے ۔جو ان دنوں بھی اپنے مرکزی امیر حضرت مولانا قاری سید محمد عثمان منصورپو ری دامت برکاتہم اور مرکزی قائد مولانا سید محمود مدنی کی رہنمائی و نگرانی میں بازآبادکاری پروجیکٹ کو روبہ عمل لانے میں مصروف ہے۔پچھلے دنوں مولانا محمود مدنی نے دو دفعہ اس علاقے کا دورہ کیا تو مرکزی سیکریٹری مولانا حکیم الدین قاسمی نے بھی دو دفعہ اس علاقے میں پہنچ کر جائزہ لیا اور مولانا محمود مدنی کی رہنما ئی میں مصیبت زدگان کی امداد و اعانت کے لئے انتظامیہ بطور خاص ضلعی حکام اور وزیر اعلٰی سے بھی ملاقات کر کے سیلاب زدگان کی پریشانیوں کے ازالے کی طرف متوجہ کیا جس کو جلدانجام دینے کا ان حکام نے وعدہ بھی کیا ۔اسی کے ساتھ جہد مسلسل میں پیش رفت کرتے ہوئے آج مورخہ ۱۴؍ اکتوبر اتوار کی صبح دس بجے ارناکولم علاقے کے بزرگ عالم دین مولانا رفیق احمد (۸۷سال)کے مکان واقع ریحانہ منزل سر ی بودھ پورم میں سنگ بنیاد تقریب کا انعقاد آپ کی دعاوں سے کیا گیا ۔واضح ہوکہ محترم مولانا رفیق صاحب ارناکولم کی سینٹرل مسجد میں تیس سال سے زائد خطابت و امامت کے منصب پر فائز رہ چکے ہیں۔ دس سال سے زائد عرصے سے بسبب کمزوری گھر پر مقیم ہیں سیلاب میں آپ کا مکان پوری طرح ختم ہو چکا ہے مولانا کی اولادوں میں ایک چالیس سا لہ بیٹی سمیہ خاتون بیوہ ہے جو ان ہی کے ساتھ رہتی ہے اسی خاتون کے نام پر مکان بنایا جارہا ہے اس خاتون کو ایک بیٹا ہے جو بی ایس سی میں زیرتعلیم ہے۔اس تقریب میں مقامی ایم ایل اے جناب کبیر احمد نے بطور خاص شریک ہو کر حصہ لیا۔جبکہ الجامعۃ الکوثریہ آلووا کے متولی ومہتمم اور جمعیۃ ریلیف کمیٹی سینٹرل زون کے کنوینر مولانا محمد ابراہیم، کیرالا میں جمعیۃ علما ء ہند کے بازآبا د کا ری کاموں کی نگرانی کے لئے مقیم مولانا شفیق احمد القاسمی آرگنائزر جمعیۃ علما ء ہند،مولانامحمد اشرف نجمی، مقامی ذمہ دارمحمد صدیق صدر محلہ کمیٹی، محمد طاہر صدر آف منڈلم، ابو بھائی، عبدالعزیز توپل سمیت محلہ کے سرکردہ افراد و خواتین اس موقع پر شریک تھیں۔