ممبئی آبی گزرگاہ منصوبے کو ملی رفتار: شہریوں کے لیے آسان نقل و حمل کا خواب قریب
آبی نقل و حمل سے مشرق-مغرب رابطے کو مضبوط کرنے اور بڑھتی آبادی کا دباؤ کم کرنے کی کوشش
تھانے (آفتاب شیخ)
ممبئی میٹروپولیٹن ریجن (ایم ایم آر) میں آبی نقل و حمل کو فروغ دینے کے لیے ایک اہم پیش رفت ہوئی ہے۔ تھانے کے رکن پارلیمنٹ نریش مہسکے نے مرکزی وزیر برائے بندرگاہ، جہاز رانی اور آبی گزرگاہ، سروانند سونووال سے ملاقات کی اور ڈومبیولی، تھانے اور بھائیندر کو جوڑنے والے آبی منصوبے کی تکمیل میں تیزی لانے کی درخواست کی۔
رکن پارلیمنٹ مہسکے نے اس اہم مسئلے کو پارلیمنٹ میں قاعدہ 377 کے تحت بھی پیش کیا۔ ان کا کہنا تھا کہ مہاراشٹر میری ٹائم بورڈ (ایم ایم بی) کے ذریعے تیار کردہ اس منصوبے کے تحت وسئی کریک اور اُلہاس ندی کے ذریعے میرا-بھائندر، تھانے، بھیونڈی اور ڈومبیولی کو آبی گزرگاہ سے جوڑنے کا منصوبہ بنایا گیا ہے۔ اس منصوبے کے پہلے مرحلے میں بھائندر، کولشیت، کالہر اور ڈومبیولی میں چار جیٹی تعمیر کی جائیں گی، جن پر 96.12 کروڑ روپے کی لاگت آئے گی۔
منصوبے کا مقصد شہریوں کو سستا اور آسان آبی نقل و حمل فراہم کرنا ہے۔ چار جیٹی کی تعمیر ڈیڑھ سال میں مکمل کرنے کا ہدف مقرر کیا گیا ہے۔ ساگر مالا اسکیم کے تحت مرکز اور ریاست کی برابر مالی معاونت سے منصوبے کی تکمیل کی جائے گی۔ اگلے مرحلے میں وسئی، کلیان، پارسیک، ناگلا بندر، انجور دیو اور گھوڑبندر میں مزید جیٹیاں تعمیر کی جائیں گی۔
مہسکے کا کہنا ہے کہ یہ منصوبہ مشرق-مغرب رابطے کو بہتر بنائے گا اور بڑھتی ہوئی آبادی کے دباؤ کو کم کرنے میں اہم کردار ادا کرے گا۔ انہوں نے اس منصوبے کی رفتار میں حائل بیوروکریٹک اور مالی رکاوٹوں کو جلد ختم کرنے کے لیے وزیر سے اقدامات کی درخواست کی۔ مرکزی وزیر سروانند سونووال نے یقین دلایا کہ اس منصوبے کی بروقت تکمیل کے لیے ہر ممکن اقدام کیا جائے گا۔
یہ آبی منصوبہ نہ صرف شہریوں کو آمد و رفت کے لیے ایک سستا متبادل فراہم کرے گا بلکہ ممبئی میٹروپولیٹن ریجن میں رابطے کو بھی بہتر بنائے گا۔
