ممبئی: مہاراشٹر حکومت کی "لاڈکی بہن یوجنا” کے تحت ریاست کی اہل خواتین کو ہر ماہ 1500 روپے کی مالی امداد فراہم کی جا رہی ہے۔ اب حکومت نے اس منصوبے سے متعلق ایک اہم فیصلہ لیا ہے، جس سے ہزاروں خواتین کو فائدہ پہنچنے کی امید ہے۔
ریاست کی وزیر برائے خواتین و اطفال کی بہبود آدیتی تٹکرے نے اس فیصلے کی معلومات دیتے ہوئے بتایا کہ جن خواتین کی ای-کے وائی سی (e-KYC) مکمل نہیں ہو سکی تھی، انہیں دوبارہ یہ عمل مکمل کرنے کا موقع دیا جا رہا ہے۔
انہوں نے کہا کہ ای-کے وائی سی کا عمل دوبارہ شروع کر دیا گیا ہے اور اہل خواتین آئندہ چھ ماہ کے اندر اپنی ای-کے وائی سی مکمل کر سکتی ہیں، تاکہ انہیں منصوبے کا فائدہ بغیر کسی رکاوٹ کے ملتا رہے۔
واضح رہے کہ مہایوتی حکومت نے انتخابی وعدے کے دوران لاڈکی بہن یوجنا کے تحت ماہانہ امداد 1500 روپے سے بڑھا کر 2100 روپے کرنے کا اعلان کیا تھا۔ تاہم اس اضافے پر آدیتی تٹکرے نے کہا کہ فی الحال اس حوالے سے کوئی حتمی تاریخ طے نہیں کی گئی ہے۔
انہوں نے مزید کہا کہ لاڈکی بہن یوجنا کامیابی کے ساتھ جاری ہے، جبکہ امدادی رقم 2100 روپے کرنے یا نہ کرنے کا حتمی فیصلہ وزیرِ اعلیٰ کریں گے۔
اس بیان کے بعد اب تمام نظریں ریاستی حکومت اور وزیرِ اعلیٰ کے فیصلے پر مرکوز ہیں کہ لاڈکی بہن یوجنا کے تحت ماہانہ امدادی رقم میں اضافہ کب سے نافذ کیا جائے گا۔