اہم خبریں: مودی حکومت کورونا وائرس پر ’ٹائٹینک کے کیپٹن‘ کی طرح بیان نہ دے… راہل

by

مودی حکومت کورونا وائرس پر ٹھوس منصوبہ بنائے، ٹائٹینک کے کیپٹن کی طرح بیان نہ دے: راہل گاندھی

لوک سبھا اور راجیہ سبھا میں مرکزی وزیر صحت ہرش وردھن کے ذریعہ کورونا وائرس پر بیان دیے جانے کے بعد راہل گاندھی نے اپنا رد عمل ظاہر کیا ہے۔ انھوں نے ٹوئٹ کرتے ہوئے کہا ہے کہ ’’وزیر صحت نے کہا کہ کورونا وائرس بحران حکومت کے کنٹرول میں ہے، یہ بات ٹھیک ٹائٹینک کے کیپٹن کی طرح ہے کہ مسافروں کو گھبرانے کی ضرورت نہیں ہے کیونکہ ان کا جہاز ڈوب نہیں سکتا۔ اس بحران سے نمٹنے کے لیے ضرورت ہے کہ حکومت ایک ٹھوس منصوبہ بنائے اور اس پر عمل کرے۔‘‘


دہلی تشدد کے خلاف این ایس یو آئی نے نکالا ’شانتی مارچ‘

دہلی تشدد کے خلاف آج این ایس یو آئی کارکنان نے دہلی میں زبردست ’شانتی مارچ‘ نکالا۔ اس مارچ میں بڑی تعداد میں این ایس یو آئی کارکنان شامل ہوئے۔ کارکنان ہاتھوں میں پلے کارڈس لیے ہوئے تھے جن میں ’ذات پات توڑ دو، بھید بھاؤ چھوڑ دو‘ اور ’ہم سب ایک ہیں، مودی-شاہ فیک ہیں‘ جیسے نعرے لکھے ہوئے تھے۔


کورونا وائرس سے بچنے کے لیے لکھنؤ میں گوشت اور مچھلی فروخت کرنے پر لگی پابندی

کورونا وائرس کی وجہ سے ہندوستان کی کئی ریاستوں میں احتیاطی تدابیر کی جا رہی ہیں۔ اس درمیان خبریں موصول ہو رہی ہیں کہ اتر پردیش کے لکھنؤ میں گوشت اور مچھلی فروخت کرنے پر پابندی عائد کر دی گئی ہے۔ لکھنؤ کے ضلع مجسٹریٹ ابھشیک پرکاش نے میڈیا سے بات چیت کرتے ہوئے بتایا کہ کھلی جگہوں پر گوشت، مچھلی اور نیم پکے ہوئے گوشت فروخت کرنے پر پابندی لگا دی گئی ہے۔ ایسا اس لیے کیا گیا ہے تاکہ کورونا وائرس کے خطرہ کو کم کیا جا سکے۔ ضلع مجسٹریٹ نے مزید بتایا کہ ہوٹلوں اور ریستورانوں میں بھی کہہ دیا گیا ہے کہ وہ صفائی کا مکمل خیال رکھیں اور ہائجینک کھانے کا استعمال کریں۔


خاتون ٹی-20 عالمی کپ: ہندوستانی ٹیم بلامقابلہ فائنل میں پہنچی

آئی سی سی خاتون ٹی-20 عالمی کپ کا پہلا سیمی فائنل بارش کی وجہ سے رد کر دیا گیا ہے۔ اس فیصلہ کے بعد ہندوستان کی ٹیم بلامقابلہ فائنل میں پہنچ گئی جب کہ انگلینڈ کو مایوسی کا سامنا کرنا پڑا۔ دراصل لیگ اسٹیج کے دوران پوائنٹ ٹیبل میں سرفہرست رہنے کی وجہ سے ہندوستانی ٹیم کو فائنل کا ٹکٹ مل گیا۔ یہ پہلا موقع ہے جب ہندوستانی خواتین کی کرکٹ ٹیم ٹی-20 عالمی کپ کے فائنل میں پہنچی ہے۔


ہمیں امید ہے کہ آج نیا ڈیتھ وارنٹ جاری ہو جائے گا: نربھیا کی ماں

نربھیا کے قصورواروں کی پھانسی کی سزا تین بار ملتوی ہو جانے سے مایوس نربھیا کی ماں نے امید ظاہر کی ہے کہ آج پٹیالہ ہاؤس ایک بار پھر ڈیتھ وارنٹ جاری کرے گا۔ انھوں نے میڈیا سے بات کرتے ہوئے کہا کہ ’’جس طرح سے بار بار پھانسی ملتوی ہوئی ہے، ہم سوچ بھی نہیں سکتے ہیں کہ ہمارا جدوجہد پورا ہو گیا ہے۔ کل جیسے ہی رحم کی عرضی خارج ہوئی، ہم نے شام کو عرضی لگا دی، آج 2 بجے سماعت ہے۔ ہمیں امید ہے کہ آج نیا ڈیتھ وارنٹ جاری ہو جائے گا۔‘‘


وارث پٹھان کو کرناٹک پولس نے دوسری بار بھیجا نوٹس، متنازعہ بیان دینے کا الزام

اے آئی ایم آئی ایم لیڈر وارث پٹھان کو کرناٹک پولس کی طرف سے دوسرا نوٹس جاری کیا گیا ہے۔ کلبرگی پولس کی طرف سے جاری نوٹس میں وارث پٹھان کو پوچھ تاچھ کے لیے بلایا گیا ہے۔ وارث پٹھان پر ان کے اس بیان کے بعد کیس درج کیا گیا ہے جس میں انھوں نے کہا تھا کہ 15 کروڑ 100 کروڑ پر بھاری ہے۔


یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – بشکریہ قومی آواز بیورو

اپنی رائے یہاں لکھیں

Discover more from ورق تازہ

Subscribe now to keep reading and get access to the full archive.

Continue reading