امیتابھ، شاہ رخ اور عدنان نے چندریان-2 مشن کو بتایا کامیاب، جانیے کیسے…

مشن چاند حالانکہ پوری طرح کامیاب نہیں ہوا ہے، لیکن اِسرو اس مشن کو مکمل کرنے کے اتنے قریب پہنچ گیا تھا کہ ملک و بیرون ملک کی کئی معروف ہستیوں نے ہندوستانی سائنسدانوں کو کھل کر مبارکباد دی ہے۔ ویسے بھی لینڈر ’وکرم‘ سے اِسرو کا رابطہ ٹوٹا ہے اور چاند کے مدار میں چکر لگا رہا چندریان-2 کا ایک حصہ اپنا کام جاری رکھے ہوئے ہے۔ اس درمیان بالی ووڈ کی کئی ہستیوں نے بھی اِسرو کی مکمل ٹیم کی حوصلہ افزائی کی ہے اور چندریان-2 مشن کو کامیابی کی ایک داستان قرار دیا ہے۔

بالی ووڈ کی مشہور و معروف ہستی امیتابھ بچن نے چندریان-مشن کے بارے میں ایک بہترین ٹوئٹ کیا ہے۔ اس ٹوئٹ میں انھوں نے لکھا ہے کہ ’’آج ایک نیا سورج نکلا ہے، چاند کو پھر پکڑیں گے۔‘‘ ایک دیگر ٹوئٹ میں انھوں نے لکھا ہے کہ ’’چاند یہاں سے 384400 کلو میٹر دور ہے اور ہم اس وقت ناکام ہوئے جب یہ دوری محض 2.1 رہ گئی۔دیکھا جائے تو یہ فرق محض 0.0005463 فیصد ہے۔ ساتھ ہی یہ ناکامی ایک نئی شروعات کی بنیاد بھی ہے۔اس ناکامی میں کامیابی کا ایک مزہ بھی ہے۔ ہمیں اِسرو اور اپنے سائنسدانوں پر فخر ہے۔‘‘

شہرت یافتہ گلوکار اور موسیقار عدنان سمیع نے بھی امیتابھ بچن کی طرح ہندوستان کے مشن چاند کو کامیاب بتایا ہے اور انھوں نے اپنے ٹوئٹ میں لکھا ہے کہ ’’384000 کلو میٹر دور چاند پر پہنچنے کا ہمارا سفر صرف 2 کلو میٹر پہلے ختم ہو گیا۔ ہم نے 383998 کلو میٹر کا سفر کیا۔ یہ حیرت انگیز ہے۔‘‘ ساتھ ہی انھوں نے یہ بھی لکھا کہ ’’ہم بہت قریب تک پہنچ گئے، ہمیں فخر ہے۔ ہمیں اپنے سائنسدانوں کی مہارت، حوصلہ اور جدوجہد پر فخر ہے۔‘‘ یہاں قابل ذکر ہے کہ ہماری زمین سے چاند کی دوری 384400 کلو میٹر ہے جب کہ عدنان سمیع نے 384000 بتایا ہے۔ یہاں پر انھوں نے ایک چھوٹی سی غلطی کر دی ہے، لیکن انھوں نے واضح طور پر یہ ظاہر کر دیا ہے کہ ہندوستان اپنے مشن میں کامیاب ہونے سے چند قدم ہی دور رہ گیا، اور اسے ناکامی نہیں کہا جا سکتا۔

کنگ خان کے نام سے مشہور اور بالی ووڈ میں رومانس کے بادشاہ کہے جانے والے شاہ رخ خان نے بھی اپنا رد عمل چندریان-2 سے متعلق ظاہر کیا ہے۔ انھوں نے اپنے ٹوئٹ میں لکھا ہے کہ ’’کئی بار ہم اس ہدف تک نہیں پہنچ پاتے ہیں جہاں ہمیں پہنچنا ہوتا ہے۔ ضروری بات یہ ہے کہ ہم نے کوشش تو کی، اور ہم نے بھروسہ اور امید کو قائم رکھا۔ ہماری موجودہ حالت ہماری آخری منزل نہیں ہے… ہمیں اِسرو پر فخر ہے۔‘‘

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-