جموں و کشمیر میں پھنسے مہاراشٹر کے سیاحوں کی حفاظت کے لیے نائب وزیر اعلیٰ اجیت پوار نے کمان سنبھالی
ہر شہری کو بحفاظت گھر واپس لانا اولین ترجیح، سیاحوں کی واپسی کے لیے اضافی پروازوں کا انتظام
ممبئی: جموں و کشمیر کے پہلگام میں ہونے والے بزدلانہ دہشت گرد حملے کے بعد مہاراشٹر حکومت پوری طرح متحرک ہو گئی ہے تاکہ ریاست کے پھنسے ہوئے سیاحوں کی حفاظت اور بحفاظت واپسی کو یقینی بنایا جا سکے۔ اس سلسلے میں نائب وزیر اعلیٰ اجیت پوار نے جموں و کشمیر کے وزیر اعلیٰ عمر عبداللہ سے ٹیلیفون پر رابطہ کر کے فوری امداد اور راحت پہنچانے کی اپیل کی۔
اجیت پوار نے کہا کہ حکومت کی سب سے بڑی ترجیح یہ ہے کہ متاثرہ خاندانوں کو اعتماد میں لیا جائے اور ہر سیاح کو بحفاظت واپس لایا جائے۔ اس مقصد کے تحت وزارت میں قائم آفاتِ سماوی کے کنٹرول روم میں خصوصی افسران کی تقرری کی جائے گی، جو پھنسے ہوئے سیاحوں سے براہ راست رابطہ رکھیں گے اور ضروری تعاون فراہم کریں گے۔ انہوں نے سیاحوں کے اہل خانہ سے بھی اپیل کی کہ وہ گھبراہٹ کا شکار نہ ہوں۔
نائب وزیر اعلیٰ نے حکام کو ہدایت دی ہے کہ مرکز اور جموں و کشمیر کی حکومت کے ساتھ قریبی تال میل رکھتے ہوئے ہر ممکن مدد فراہم کی جائے۔ انہوں نے شہری ہوابازی کے مرکزی وزیر مملکت مرلی دھر موہول سے رابطہ کر کے سیاحوں کی واپسی کے لیے خصوصی پروازوں کا انتظام کرنے کی درخواست بھی کی ہے۔ زیادہ سے زیادہ پروازیں چلانے کی منصوبہ بندی کی جا رہی ہے تاکہ سیاحوں کی فوری اور محفوظ واپسی کو ممکن بنایا جا سکے۔پوار خود اس پورے آپریشن کی نگرانی کر رہے ہیں اور ریاستی و مرکزی ایجنسیوں کے ساتھ مسلسل رابطے میں ہیں۔ انہوں نے بتایا کہ ریاستی حکومت نے ضلعی انتظامیہ، محکمہ سیاحت اور ایمرجنسی مینجمنٹ سسٹم کو ہائی الرٹ پر رکھا ہے اور صورت حال پر قریبی نظر رکھی جا رہی ہے۔ پوار نے کچھ پھنسے ہوئے سیاحوں سے فون پر بات بھی کی اور انہیں حوصلہ دلایا۔
اجیت پوار نے متعلقہ محکموں کو سختی سے ہدایت دی ہے کہ اگر کوئی مہاراشٹری شہری جاں بحق ہوا ہو تو اس کی میت فوری طور پر ریاست میں لائی جائے، زخمیوں کو بہتر طبی سہولیات فراہم کی جائیں اور ہوٹلوں میں پھنسے تمام سیاحوں کو بحفاظت واپس لایا جائے۔انہوں نے کہا کہ یہ سارا عمل تیزی اور ہم آہنگی کے ساتھ مکمل کیا جائے گا۔ اجیت پوار نے ریاست کے شہریوں سے امن اور صبر کا دامن تھامے رکھنے کی اپیل کی اور کہا کہ سیاحوں کے اہل خانہ کو بروقت اور درست معلومات فراہم کی جا رہی ہیں۔ انہوں نے بتایا کہ سیاحوں کی فہرست، ان کے قیام کی تفصیل اور واپسی کے ممکنہ منصوبے کی تیاری جاری ہے۔
