ممبئی: پنگری (تعلقہ بارشی، ضلع شولاپور) کے 72 سالہ لطیف شکر جی باغبان کانگریس لیڈر راہول گاندھی کی بھارت جوڑو یاترا میں شرکت کے لیے براہ راست روانہ ہو گئے ہیں۔ وہ کل سے کرنول (آندھرا پردیش) سے یاترا میں حصہ لیں گے اور آج ممبئی میں انہیں سابق وزیر مملکت ستیج عرف بنٹی پاٹل نے مہاراشٹر پردیش کانگریس کی جانب سے مبارکباد دی۔
اس موقع پر مہاراشٹر پردیش کانگریس کے چیف ترجمان اتل لونڈے، ریاستی جنرل سکریٹری اور سوشل میڈیا ڈیپارٹمنٹ کے سربراہ وشال متیموار، یوتھ کانگریس کے سابق ریاستی صدر ستیہ جیت تامبے، سینئر صحافی راجو پارولیکر اور دیگر معززین موجود تھے۔ باغبان پیشے کے لحاظ سے ٹیمپو ڈرائیور ہیں۔ وہ تقریباً 1975 سے کانگریس کے سرگرم کارکن ہیں۔ وہ اندرا گاندھی کے نظریے سے متاثر تھے اور خط و کتابت کے ذریعے اندرا گاندھی سے رابطے میں تھے۔
اندرا گاندھی کے لکھے گئے خطوط کو انہوں نے آج بھی محفوظ کر رکھا ہے۔ لطیف باغبان آندھرا پردیش کے کرنول سے یاترا میں حصہ لے رہے ہیں اور وہاں سے وہ الورو، منترالیم، ادونی، رائچور وغیرہ مقامات پر پیدل یاترا میں حصہ لیں گے۔ وہ دیوالی تک تقریباً 8 دن تک اس یاترا میں حصہ لیں گے۔ اس کے بعد انہوں نے پیدل چل کر مہاراشٹر میں منعقد ہونے والی یاترا میں شرکت کا ارادہ ظاہر کیا ہے۔
اس موقع پر لطیف باغبان نے اپیل کی کہ راہل گاندھی کی طرف سے شروع کی گئی بھارت جوڑو یاترا ملک کی جمہوریت کو بچانے کے لیے بہت ضروری ہے اور ہر کسی کو اس میں حصہ لینا چاہیے۔ ستیج عرف بنٹی پاٹل نے کہا کہ 72 سال کی عمر میں بھی باغبان کا پیدل چلنے اور بھارت جوڑو یاترا میں حصہ لینے کا فیصلہ یقیناً متاثر کن ہے۔ بھارت جوڑو یاترا میں ہر طبقے کے لوگ شامل ہو رہے ہیں۔ اس سے مستقبل میں تبدیلی ناگزیر ہے۔