یوگی کی نفرت کی سیاست کوتیلنگانہ کے ووٹرس نے مسترد کردیا

حیدر آباد:12ڈسمبر(ایجنسیز)تلنگانہ انتخابات کے نتائج میں ریاست کے عوام نے اترپردیش کے وزیراعلی یوگی آدتیہ ناتھ کی سیاست کو مسترد کردیا جنہوں نے وعدہ کیا تھا کہ ریاست میں بی جے پی کے اقتدار میں آنے پر ضلع کریم نگر کا نام تبدیل کرتے ہوئے کری پورم اور حیدرآباد کا نام تبدیل کرتے ہوئے بھاگیہ نگر رکھا جائے گا۔بی جے پی کو تلنگانہ اسمبلی انتخابات کے نتائج میں شرمناک شکست کا سامنا کرنا پڑا۔ تحلیل شدہ اسمبلی میں اس کے ارکان پانچ تھے تاہم نتائج کے سامنے آنے کے بعد اس کا صرف ایک ہی رکن اسمبلی منتخب ہوسکا۔ عوام نے ان نتائج کے ذریعہ بی جے پی کو شرمناک شکست سے دوچار کیا اور آدتیہ ناتھ کی تقاریر کو بھی مسترد کردیا۔بی جے پی کے سینئر لیڈران بشمول مرکزی وزرا نے تلنگانہ اسمبلی انتخابات میں سرگرمی کے ساتھ مہم چلائی تھی اور بی جے پی کے صدر امت شاہ ، وزیراعظم مودی نے بھی انتخابی جلسوں سے خطاب کیا تھا۔ تلنگانہ کے وزیراعلی کے چندرشیکھرراو نے اپنی پریس کانفرنس میں طنزیہ طورپر کہا کہ حیدرآباد کا نام تبدیل کرنے کی باتیں کرنے والے کہاں ہیں؟