ممبئی یوتھ کانگریس کا ایس آئی آر تربیتی پروگرام، کارکنان کو ووٹر لسٹ نظرثانی سے متعلق مکمل رہنمائی
’’گِگ ورکرز نیائے ابھیان‘‘ کتابچہ کا اجرا، ووٹ کے حق کے تحفظ کا عزم
ممبئی: مہاراشٹر میں جاری خصوصی ووٹر لسٹ نظرثانی مہم (اسپیشل انٹینسیو ریویژن – ایس آئی آر) کے تناظر میں ممبئی یوتھ کانگریس کی جانب سے عہدیداران اور کارکنان کے لیے ایک تفصیلی تربیتی پروگرام کا انعقاد کیا گیا، جس میں انتخابی عمل کے مختلف پہلوؤں پر جامع رہنمائی فراہم کی گئی۔ یہ پروگرام کولابا کے گاندھی بھون میں یوتھ کانگریس کی صدر زینت شبرین کی قیادت میں منعقد ہوا، جہاں بڑی تعداد میں کارکنان اور عہدیداران نے شرکت کر کے ووٹر لسٹ نظرثانی کے عمل کو بہتر طور پر سمجھنے کی کوشش کی۔
اس تربیتی نشست میں ممبئی کانگریس کے اقلیتی شعبہ کے عہدیدار اسد عثمانی نے بطور مرکزی تربیت کار شرکت کی اور شرکاء کو ایس آئی آر عمل کی مکمل تفصیلات سے آگاہ کیا۔ انہوں نے ووٹر لسٹ نظرثانی کے تکنیکی پہلوؤں، فارم جمع کرنے کے طریقہ کار، اعتراضات درج کرنے کے عمل، اور اہل ووٹروں کے ناموں کو فہرست سے خارج ہونے سے بچانے کے لیے ضروری اقدامات پر تفصیل سے روشنی ڈالی۔ انہوں نے کارکنان کو یہ بھی بتایا کہ کس طرح زمینی سطح پر فعال ہو کر ہر اہل شہری کے حقِ رائے دہی کو یقینی بنایا جا سکتا ہے۔
اس موقع پر ممبئی یوتھ کانگریس کی صدر زینت شبرین، تنظیمی جنرل سکریٹری تیجس چاندورکر، ضلع صدور پراگیا دھولے، فرحان منصوری، شیکھر جگتاپ، شیو جتن یادو، شمال مغربی ممبئی کے ضلع ورکنگ صدر عبدالسمیع شاہ، ریاستی جنرل سکریٹری متیش سونکر، امن دیپ سینی، آصف خان سمیت متعدد عہدیداران اور کارکنان موجود تھے، جنہوں نے اس تربیتی پروگرام میں بھرپور شرکت کی۔
پروگرام سے خطاب کرتے ہوئے زینت شبرین نے کہا کہ جن ریاستوں میں اس سے قبل ایس آئی آر مہم چلائی گئی، وہاں لاکھوں ووٹروں کے نام فہرست سے حذف کیے جانے کی شکایات سامنے آئی تھیں، جو جمہوری عمل کے لیے تشویشناک ہے۔ انہوں نے کہا کہ اسی پس منظر میں ممبئی میں یہ تربیتی پروگرام منعقد کیا گیا تاکہ کسی بھی اہل ووٹر کا نام غلط طریقے سے حذف نہ ہو اور ہر شہری کے حقِ رائے دہی کا تحفظ یقینی بنایا جا سکے۔ انہوں نے اس عزم کا اظہار کیا کہ یوتھ کانگریس اپنے کارکنان کو اس قابل بنائے گی کہ وہ زمینی سطح پر عوام کی مدد کر سکیں اور کسی بھی ناانصافی کے خلاف آواز اٹھا سکیں۔
انہوں نے مزید کہا کہ جمہوریت میں ووٹ کا حق بنیادی حیثیت رکھتا ہے اور اس حق کا تحفظ ہر شہری کی ذمہ داری ہے۔ ووٹر لسٹ سے نام کا اخراج محض ایک انتظامی مسئلہ نہیں بلکہ شہری حقوق پر براہ راست حملہ ہے، اس لیے ضروری ہے کہ ایس آئی آر کے عمل میں مکمل شفافیت اور احتیاط برتی جائے۔ انہوں نے مطالبہ کیا کہ الیکشن کمیشن اس عمل کو غیر جانبدارانہ اور شفاف طریقے سے مکمل کرے تاکہ عوام کا اعتماد برقرار رہے۔
زینت شبرین نے یہ بھی اعلان کیا کہ ممبئی میں ایس آئی آر عمل مکمل ہونے تک یوتھ کانگریس کی جانب سے ووٹروں کو ہر ممکن رہنمائی اور مدد فراہم کی جائے گی، تاکہ کوئی بھی اہل شہری اپنے حقِ رائے دہی سے محروم نہ ہو۔
اس موقع پر ’’گِگ ورکرز نیائے ابھیان‘‘ کے تحت تیار کردہ ایک خصوصی کتابچہ بھی جاری کیا گیا۔ زینت شبرین نے بتایا کہ گِگ معیشت سے وابستہ مزدوروں کے حقوق کے تحفظ، سماجی تحفظ کی فراہمی اور انہیں انصاف دلانے کے مقصد سے یہ مہم شروع کی گئی ہے۔ انہوں نے کہا کہ بدلتے معاشی حالات میں گِگ ورکرز کو درپیش مسائل کو اجاگر کرنا اور ان کے حقوق کے لیے آواز اٹھانا وقت کی اہم ضرورت ہے، اور کانگریس اس سلسلے میں اپنی جدوجہد جاری رکھے گی۔
MPCC Urdu News 19 April 26.docx
