ناندیڑ:(ورق تازہ نیوز) ضلع پولیس کی جانب سے "آپریشن کریک ڈاؤن” کے تحت غیر قانونی سرگرمیوں کے خلاف جاری مہم میں مقامی جرائم شاخ (ایل سی بی) ناندیڑ نے بڑی کارروائی کرتے ہوئے غیر قانونی جوئے کے اڈے پر چھاپہ مارا۔ اس کارروائی میں 12 افراد کے خلاف مقدمہ درج کیا گیا جبکہ 29 ہزار 830 روپے مالیت کا نقد رقم اور جوئے کا سامان ضبط کیا گیا۔
پولیس کے مطابق پولیس سپرنٹنڈنٹ ناندیڑ، جناب اویناش کمار (آئی پی ایس) کی ہدایت پر ضلع بھر میں غیر قانونی کاروبار اور جرائم کے خلاف خصوصی مہم چلائی جا رہی ہے۔ اسی سلسلے میں پولیس انسپکٹر اتُل بھوسلے کی نگرانی میں پولیس ٹیم کو خفیہ اطلاع موصول ہوئی کہ موضع کہالا بزرگ کے کھیت کے علاقے میں چند افراد "تیرنٹ” نامی جوا کھیل رہے ہیں۔اطلاع کی بنیاد پر 10 جون 2026 کی شام پولیس نے موقع پر چھاپہ مارا۔
کارروائی کے دوران 12 افراد جوا کھیلتے ہوئے پائے گئے۔ پولیس کو دیکھتے ہی 9 ملزمان فرار ہونے میں کامیاب ہوگئے جبکہ 3 افراد کو موقع سے حراست میں لیا گیا۔گرفتار افراد میں کریم الدین عرف نثار حسین شیخ، آصف الدین لیاقت شیخ اور گنگاور باباراؤ جادھو شامل ہیں۔ دیگر 9 فرار ملزمان کی تلاش جاری ہے۔پولیس نے موقع سے نقد رقم اور جوئے کے سامان سمیت مجموعی طور پر 29 ہزار 830 روپے مالیت کا مال ضبط کیا۔
اس معاملے میں پولیس اسٹیشن کنٹور میں مہاراشٹر جواء ایکٹ کی متعلقہ دفعات کے تحت مقدمہ درج کر لیا گیا ہے۔یہ کارروائی پولیس سپرنٹنڈنٹ اویناش کمار، ایڈیشنل سپرنٹنڈنٹ آف پولیس ارچنا پاٹل، ایڈیشنل سپرنٹنڈنٹ آف پولیس سورج گرو اور پولیس انسپکٹر اتُل بھوسلے کی رہنمائی میں انجام دی گئی۔ کامیاب کارروائی پر پولیس سپرنٹنڈنٹ نے متعلقہ افسران اور عملے کی ستائش کرتے ہوئے انہیں مبارکباد دی۔