نئی دہلی:ڈینگی جیسی خطرناک بیماری سے اب گھبرانے کی ضرورت نہیں، کیونکہ اس کے بچاؤ کے لیے بھارت کو ایک بڑی کامیابی ملنے والی ہے۔ اگر سب کچھ منصوبے کے مطابق رہا تو جلد ہی ڈینگی کی ویکسین تیار ہو جائے گی۔ انڈین کاؤنسل آف میڈیکل ریسرچ (ICMR) کے تحت کام کرنے والا نیشنل انسٹی ٹیوٹ آف وائرولوجی (NIV) پونے میں اس ویکسین کا حتمی مرحلے کا ٹرائل جاری ہے۔
بھارت کو ملے گی پہلی مکمل دیسی ڈینگی ویکسین
موصولہ اطلاعات کے مطابق یہ ویکسین مکمل طور پر بھارت میں تیار کی گئی ہے، جس پر نیشنل انسٹی ٹیوٹ آف وائرولوجی کے ماہرین گزشتہ کئی برسوں سے کام کر رہے ہیں۔ فی الحال اس ویکسین کا انسانوں پر تجربہ کیا جا رہا ہے، اور اب تک کے نتائج نہایت حوصلہ افزا رہے ہیں۔ اگر حتمی مرحلے کے یہ ٹرائل کامیاب رہے تو بھارت کو جلد ہی ڈینگی کے خلاف پہلی محفوظ اور مؤثر دیسی ویکسین حاصل ہو جائے گی۔
ماہرین صحت کا کہنا ہے کہ اس ویکسین کی منظوری کے بعد نہ صرف ملک میں ڈینگی کے مریضوں کی تعداد میں کمی آئے گی بلکہ عوام کو ایک بڑی راحت بھی ملے گی۔
