تھانے میں تعمیراتی آلودگی کے خلاف بڑا ایکشن، 39 منصوبوں کو نوٹس5909 گاڑیاں جرمانے کی زد میں، ہوٹلوں اور بیکریوں میں لکڑی جلانے پر پابندی عائد
تھانے (آفتاب شیخ)
تھانے میونسپل کارپوریشن نے فضائی آلودگی پر قابو پانے کے لیے بڑے پیمانے پر کارروائی کا آغاز کر دیا ہے۔ تعمیراتی دھول کے پھیلاؤ کو روکنے کے لیے کارپوریشن نے 297 تعمیراتی سائٹ کو فضائی آلودگی کنٹرول رہنما اصولوں پر عمل درآمد کا حکم دیا ہے۔ ان میں سے 39 بلڈروں کو ضوابط کی خلاف ورزی پر شوکاز نوٹس جاری کیے گئے ہیں اور فوری تعمیل نہ کرنے کی صورت میں ان کے منصوبے معطل کرنے کا عندیہ دیا گیا ہے۔
میونسپل کارپوریشن کے ایڈیشنل کمشنر سندیپ مالوی کے مطابق، ابتدائی نوٹس کے بعد 31 سائٹس نے مکمل ضوابط کی پابندی کی ہے جبکہ 151 سائٹس پر جزوی عمل درآمد پایا گیا، جن پر 4 لاکھ روپے جرمانہ عائد کیا گیا۔ تاہم، 39 ترقیاتی منصوبوں نے بالکل بھی عمل نہیں کیا، جس پر انہیں فوری وضاحت پیش کرنے کا حکم دیا گیا ہے۔
ہائی کورٹ کے رہنما اصولوں کے تحت تھانے کارپوریشن کا ماحولیاتی محکمہ مسلسل کارروائی کر رہا ہے۔ بدھ کے روز ایڈیشنل کمشنر سندیپ مالوی کی قیادت میں ایک اعلیٰ سطحی جائزہ اجلاس منعقد ہوا، جس میں تعمیراتی مقامات پر فضائی آلودگی کنٹرول کے اقدامات پر غور کیا گیا۔ اس موقع پر حکام کو ہدایت دی گئی کہ تمام 297 سائٹس کا معائنہ کیا جائے اور رہنما اصولوں پر سختی سے عمل کرایا جائے۔
کارپوریشن نے علاقے میں پتے، کچرا اور پلاسٹک جلانے پر سخت پابندی عائد کی ہے اور اب تک 20,000 روپے کے جرمانے عائد کیے جا چکے ہیں۔ مزید یہ کہ ہوٹلوں، تندور اور بیکریوں میں جلانے والی لکڑی کے استعمال پر بھی پابندی لگائی گئی ہے۔
کارپوریشن کے 300 ٹن صلاحیت کے منصوبے کے تحت مارچ 2024 سے نومبر 2024 تک 7,414 ٹن تعمیراتی ملبہ ری سائیکل کیا گیا۔ تمام تعمیراتی ٹھیکیداروں کو ہدایت دی گئی ہے کہ وہ ملبے کی نقل و حمل صرف GPS سے لیس گاڑیوں کے ذریعے کریں۔
کارپوریشن نے فضائی آلودگی کے خلاف اپنی کارروائی کے دوران 5909 گاڑیوں پر جرمانے عائد کیے، جن میں زیادہ تر گاڑیاں غیر محفوظ تھیں یا ان کے پاس مناسب دستاویزات موجود نہیں تھیں۔
عوامی شکایات کے ازالے کے لیے ٹول فری نمبر 8657887101 اور ای میل pcctmc.ho فراہم کیا گیا ہے تاکہ لوگ فضائی آلودگی سے متعلق مسائل رپورٹ کر سکیں۔
میونسپل کمشنر سورو بھاؤ کے احکامات کے تحت 50 تعمیراتی سائٹس پر فضائی آلودگی کی پیمائش کے آلات نصب کیے گئے ہیں۔ دیگر کاروباریوں کو بھی یہ آلات فوری نصب کرنے کی ہدایت دی گئی ہے۔ عدم تعمیل کی صورت میں سخت کارروائی عمل میں لائی جائے گی۔