پٹنہ، 04 جنوری (یو این آئی)بہار حکومت نے کورونا کی تیسری لہر سے ملک کی دیگر ریاستوں میں متاثرین کی تعداد میں اضافہ کے پیش نظر 06 سے 21 جنوری تک پوری ریاست میں رات کا کرفیو نافذ کر دیا ہے۔ اس کرفیو کے ساتھ ہی سنیما ہالز، شاپنگ مالز، کلب، سوئمنگ پول، اسٹیڈیم، جم، پارکس اور باغات کو مکمل طور پر بند رکھنے کا حکم دیا ہے۔
وزیر اعلیٰ نتیش کمار کی صدارت میں ہوئی ایک اعلیٰ سطحی جائزہ میٹنگ میں بتایا گیا کہ بہار میں پچھلے کچھ دنوں سے کورونا انفیکشن کے معاملات میں غیر معمولی اضافہ ہوا ہے۔ اس تناظر میں، موجودہ صورتحال پر جامع کنٹرول کے لیے، ریاست میں 06 جنوری سے 21 جنوری تک کچھ پابندیوں کے ساتھ معمولی سرگرمیاں جاری رکھنے کی اجازت دی گئی ہے۔ محکمہ داخلہ نے اس حوالے سے حکم نامہ بھی جاری کر دیا ہے۔حکم کے مطابق ریاست میں رات 10:00 بجے سے صبح 5:00 بجے تک کرفیو نافذ رہے گا۔