اہم خَبریں: سوشل میڈیا پر مذاق کرنے کی جگہ پی ایم مودی کورونا وائرس پر دھیان دیں… راہل

by

پی ایم مودی سوشل میڈیا پر وقت برباد نہ کریں، کورونا وائرس پر دھیان دیں: راہل گاندھی

راہل گاندھی نے پی ایم مودی کے سوشل میڈیا والے بیان پر زبردست تنقید کی ہے۔ انھوں نے ٹوئٹ کر کے کہا ہے کہ ’’محترم وزیر اعظم مودی، ملک ایمرجنسی کا سامنا کر رہا ہے اور ایسے میں آپ سوشل میڈیا اکاؤنٹس کا نام لے کر ملک کا وقت برباد نہ کریں۔ کورونا وائرس کے چیلنج سے نمٹنے کے لیے ہر ہندوستان کی توجہ مرکوز کریں۔ یہ کیسے کیا جاتا ہے، نیچے دیے گئے ویڈیو میں دیکھیں۔‘‘


لوک سبھا میں دہلی تشدد پر زبردست ہنگامہ، کارروائی کل 11 بجے تک ملتوی

لوک سبھا میں آج اپوزیشن نے دہلی تشدد پر بحث کا مطالبہ کیا جس کی منظوری نہیں ملنے پر ایوان میں ہنگامہ برپا ہو گیا۔ ہنگامہ کی وجہ سے پہلے کارروائی 11 بجے تک ملتوی ہوئی اور پھر 2 بجے کے لیے ملتوی کر دی گئی۔ بعد ازاں جب دوپہر 2 بجے لوک سبھا کی کارروائی شروع ہوئی تو ایک بار پھر دہلی تشدد کو لے کر ہنگامہ شروع ہو گیا۔ اپوزیشن اراکین پارلیمنٹ نے اس ایشو پر ایوان میں بحث کرانے کا مطالبہ کرتے ہوئے خوب ہنگامہ کیا۔ اس کے بعد ایوان کی کارروائی بدھ کی صبح 11 بجے تک کے لیے ملتوی کر دی گئی۔


یوم خواتین پر خواتین کے نام ہوگا میرا سوشل میڈیا اکاؤنٹ: پی ایم مودی

اس یوم خاتون پر وزیر اعظم نریندر مودی اپنے سوشل میڈیا اکاؤنٹ کو خواتین کے نام کرنے والے ہیں۔ پی ایم مودی نے اس سلسلے میں ٹوئٹ کرتے ہوئے کہا کہ ’’اس یوم خواتین پر میں اپنے سوشل میڈیا اکاؤنٹ کو خاتون کے نام کروں گا۔ یہ لاکھوں خواتین کو ترغیب دینے میں مدد کرے گا، جن کے کام نے مجھے ترغیب دی ہے۔ کیا آپ ایسی خواتین میں سے ہیں یا آپ ایسی حوصلہ مند خاتون کو جانتے ہیں؟ SheInspiresUs# کا استعمال کرتے ہوئے ایسی کہانیوں کو شیئر کریں۔‘‘


دہلی تشدد: فائرنگ کرنے والا شاہ رخ اتر پردیش سے گرفتار، 3.30 بجے پریس کانفرنس

دہلی تشدد کے دوران جعفر آباد میں کئی راؤنڈ فائرنگ کرنے والا شاہ رخ آج اتر پردیش سے گرفتار کر لیا گیا۔ شاہ رخ کا فائرنگ کرتے ہوئے ویڈیو 24 فروری کو سامنے آیا تھا اور اس دن سے ہی وہ فرار تھا۔ آج دہلی پولس کرائم برانچ نے اسے اتر پردیش سے گرفتار کیا اور وہ اسے دہلی لے کر آ رہی ہے۔ میڈیا ذرائع کے مطابق پولس 3.30 بجے اس سلسلے میں پریس کانفرنس کرے گی۔


بی جے پی لیڈر کپل مشرا کو کسی طرح کی سیکورٹی نہیں دی گئی: پولس جوائنٹ کمشنر

دہلی پولس کے جوائنٹ کمشنر آلوک کمار نے کپل مشرا کو ’وائی کیٹگری‘ سیکورٹی دیے جانے کی خبروں پر بڑا بیان دیا ہے۔ انھوں نے کہا کہ ’’بی جے پی لیڈر کپل مشرا کو کسی طرح کی سیکورٹی نہیں دی گئی ہے۔‘‘ قابل ذکر ہے کہ پہلے اس طرح کی خبریں سامنے آئی تھیں کہ دہلی پولس نے کپل مشرا کو لاحق خطرہ کے پیش نظر انھیں وائی کیٹگری کی سیکورٹی دی ہے۔


سی اے اے-این آر سی کی مخالفت کرنے پر دہلی پولس نے 100 لوگوں کو حراست میں لیا

دہلی کے رام لیلا میدان سے شہریت ترمیمی قانون (سی اے اے) اور این آر سی کی مخالفت کر رہے لوگوں کو دہلی پولس نے حراست میں لے لیا ہے۔ حراست میں لیے گئے لوگوں کی تعداد 100 سے زائد بتائی جا رہی ہے۔


کولکاتا: ’گولی مارو‘ نعرہ لگانے کے الزام میں مزید ایک بی جے پی حامی گرفتار

’دیش کے غداروں کو، گولی مارو … کو‘ نعرہ لگانے کے الزام میں کولکاتا میں مزید ایک بی جے پی حامی کو پولس نے گرفتار کر لیا ہے۔ اب متنازعہ نعرہ لگانے والے گرفتار ملزمین کی تعداد چار ہو گئی ہے۔ قابل ذکر ہے کہ وزیر داخلہ امت شاہ کی ریلی میں بی جے پی حامیوں نے یہ متنازعہ نعرہ لگایا تھا۔


پولس نے کپل مشرا کو وائی کیٹگری کی سیکورٹی دینے کا کیا اعلان

دہلی میں تشدد پھیلانے کے الزامات کا سامنا کر رہے بی جے پی لیڈر کپل مشرا کو دہلی پولس نے وائی کیٹگری کی سیکورٹی دینے کا اعلان کیا ہے۔ دہلی ہائی کورٹ نے اشتعال انگیز بیان دینے کے لیے کپل شرما پر مقدمہ درج کرنے کے لیے کہا ہے، لیکن فی الحال اس پر عمل کرنے کی جگہ انھیں سیکورٹی دیے جانے سے کچھ لوگ حیران ہیں۔ کپل مشرا کے علاوہ سیلم پور سے بی جے پی امیدوار رہے کوشل مشرا کو بھی وائی کیٹگری کی سیکورٹی دینے کا فیصلہ کیا گیا ہے۔ کوشل مشرا کو بدنام زمانہ گینگسٹر ناصر سے پہلے ہی دھمکی ملی ہوئی ہے۔

آج پارلیمنٹ میں اروند کیجریوال پی ایم مودی سے کریں گے ملاقات!

میڈیا ذرائع سے موصول ہو رہی خبروں کے مطابق آج دہلی کے وزیر اعلیٰ اروند کیجریوال پی ایم نریندر مودی سے ملاقات کریں گے۔ موصولہ خبروں کے مطابق کیجریوال یہ ملاقات آج پارلیمنٹ میں کریں گے۔


کورونا وائرس کی دہشت، کرناٹک کے وزیر صحت نے طلب کی ایمرجنسی میٹنگ

تلنگانہ میں ایک پازیٹو کورونا وائرس کا معاملہ سامنے آنے کے بعد کرناٹک کے وزیر صحت بی. شری رامولو نے آج بنگلورو میں افسروں کی ایک ایمرجنسی میٹنگ طلب کی ہے۔ اس میٹنگ میں کورونا وائرس سے تحفظ اور ضروری اقدامات کے تعلق سے بات چیت ہوگی۔ قابل ذکر ہے کہ دہلی میں بھی کورونا وائرس کا ایک پازیٹیو معاملہ سامنے آیا ہے۔ اس کے بعد ہندوستان کی کچھ ریاستوں میں ہائی الرٹ کا اعلان کر دیا گیا ہے۔


یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – بشکریہ قومی آواز بیورو

اپنی رائے یہاں لکھیں

Discover more from ورق تازہ

Subscribe now to keep reading and get access to the full archive.

Continue reading