اہم خبر: معاشی پریشانی سے نبرد آزما گجرات کے بلڈر نے کی خودکشی

معاشی بحران کی وجہ سے گجرات کے تاجر نے کر لی خودکشی

گجرات کے سورت میں ایک بلڈر نے معاشی پریشانی کی وجہ سے خودکشی کر لی۔ بلڈر کا نام ہریش بھائی شام جی بھائی روانی بتایا جا رہا ہے۔ ہریش بھائی نے کامریج علاقے کے ایک فارم ہاؤس میں پھانسی لگا کر خودکشی کی ہے۔ بتایا جا رہا ہے کہ ہریش بھائی نے اپنے پروجیکٹوں کو پورا کرنے کے لیے پرائیویٹ فائنانسروں سے سود پر کروڑوں روپے لیے تھے جنھیں ادا نہیں کر پانے کے سبب ہریش نے خودکشی کر لی۔

مغربی بنگال: محمد شامی کو عدالت سے ملی راحت، فی الحال نہیں ہوگی ان کی گرفتاری

علی پور کورٹ (مغربی بنگال) نے کرکٹر محمد شامی کے خلاف گرفتاری وارنٹ پر عارضی روک لگانے کا حکم دیا ہے۔ اس حکم کے بعد ایک طرف جہاں محمد شامی کو فوری طور پر راحت مل گئی ہے وہیں حسین جہاں کو ضرور مایوسی ہاتھ لگی ہوگی۔ دراصل محمد شامی کی بیوی حسین جہاں نے ان پر جہیز اور جنسی استحصال کا الزام عائد کیا ہے اور اس معاملے کی آئندہ سماعت اب 2 نومبر کو ہوگی۔

جموں و کشمیر کے سوپور میں دہشت گرد تنظیموں کے 8 ارکان گرفتار

جموں و کشمیر پولس نے سوپور میں الگ الگ تنظیموں کے لیے کام کرنے والے 8 گراؤنڈ ورکرس کو گرفتار کیا ہے۔ گرفتار دہشت گرد تنظیموں کے لیے زمینی سطح پر کام کرتے تھے اور ان کے لیے اطلاعات جمع کرتے تھے۔ ذرائع کے مطابق گرفتار کیے گئے اراکین کشمیر کے لوگوں کو دھمکانے اور ملک کے خلاف مشتعل کرنے کے معاملوں میں بھی ملوث تھے۔ پولس کے ذرائع کا کہنا ہے کہ گرفتار کیے گئے دہشت گردوں نے ہی کشمیر میں الگ الگ علاقوں میں دھمکی بھرے پوسٹرس بھی لگائے۔

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-