اہم خبریں: غیر مستقل کالونیوں سے متعلق مودی حکومت نے جھوٹ بولا… عآپ کا دعویٰ

by

دہلی: غیر مستقل کالونیوں کو مستقل کرنے سے متعلق مودی حکومت نے جھوٹ بولا… عآپ کا دعویٰ

دہلی کی غیر قانونی یا غیر مستقل کالونیوں کو مستقل کرنے سے متعلق مرکز کی مودی حکومت نے عواج سے جھوٹ بولا ہے۔ یہ دعویٰ عام آدمی پارٹی نے کیا ہے۔ عآپ لیڈر سنجے سنگھ کا کہنا ہے کہ ’’بی جے پی نے 22 تاریخ کی ریلی میں غیر مستقل کالونیوں کے لوگوں کو مالکانہ حق دینے کے لیے بلا لیا، لیکن انھیں خالی ہاتھ واپس بھیج دیا۔‘‘ سنجے سنگھ نے مزید کہا کہ ’’ڈی ڈی اے کی ویب سائٹ پر لکھا گیا ہے کہ کوئی بھی غیر قانونی کالونی مستقل نہیں ہو رہا ہے، نہ کسی کو رجسٹری دے کر مالکانہ حق دیا جا رہا ہے۔‘‘


مہاراشٹر: 5 نکسلیوں نے کی خود سپردگی، 27 لاکھ روپے کا تھا انعام

مہاراشٹر کے گڑھ چرولی میں پولس کے سامنے آج تین خواتین سمیت پانچ نکسلیوں نے خود سپردگی کر دی۔ ان پانچوں نکسلیوں کے سر پر مجموعی طور پر 27 لاکھ روپے کا انعام تھا۔


کیرالہ: نومنظور شہریت ترمیمی قانون کے خلاف اسمبلی میں قرارداد پاس

ایک طرف پورے ملک میں نومنظور شہریت ترمیمی قانون کے خلاف احتجاجی مظاہرے چل رہے ہیں اور دوسری طرف کیرالہ اسمبلی میں اس قانون کے خلاف قرارداد پاس ہونے کی خبریں موصول ہو رہی ہیں۔ میڈیا ذرائع کے مطابق کیرالہ اسمبلی میں 31 دسمبر کو اس قانون کے خلاف قرارداد پاس ہوا۔


ائیر انڈیا کی نجکاری کے علاوہ ہمارے پاس کوئی دوسرا متبادل نہیں: مرکزی وزیر

ائیر انڈیا کے پرائیویٹائزیشن یعنی نجکاری کے تعلق سے مرکزی وزیر برائے شہری ہوابازی ہردیپ سنگھ پوری نے ایک بڑا بیان دیا ہے۔ انھوں نے میڈیا سے بات چیت کرتے ہوئے کہا کہ ’’میں نے یہ بات پہلے بھی کہا تھا کہ ائیر انڈیا کی نجکاری ضروری ہے۔ ہمارے پاس اس کے علاوہ کوئی دوسرا متبادل نہیں ہے۔‘‘


دہلی: سیلم پور تشدد معاملے میں گرفتار 2 افراد کو ملی 3 ہفتوں کی ضمانت

دہلی واقع سیلم پور علاقہ میں گزشتہ دنوں ہوئے تشدد کے بعد کچھ افراد کو گرفتار کیا گیا تھا۔ گرفتار دو ملزمین کو دہلی کی ایک عدالت نے تین ہفتے کے لیے عبوری ضمانت دے دی ہے۔


مغربی بنگال میں شہریت قانون کے خلاف مظاہرہ کی حمایت میں شرد پوار نے ممتا بنرجی کو لکھا خط

این سی پی سربراہ شرد پوار نے مغربی بنگال کی وزیر اعلیٰ ممتا بنرجی کو ایک خط لکھا ہے۔ اس خط میں انھوں نے شہریت ترمیمی قانون کے خلاف مغربی بنگال میں جاری احتجاجی مظاہرہ کی حمایت کی ہے۔


مہراشٹر: کانگریس وزراء نے راہل گاندھی سے کی ملاقات

مہاراشٹر کی ادھو حکومت کی توسیع 30 دسمبر کو ہوئی تھی جس میں کانگریس کے اراکین اسمبلی نے وزارتی عہدہ کا حلف لیا تھا۔ آج کانگریس کے سبھی وزراء نے کانگریس کے سابق صدر اور رکن پارلیمنٹ راہل گاندھی سے ان کی رہائش گاہ پر ملاقات کی۔ اس ملاقات کے دوران کانگریس کے سینئر لیڈر ملکارجن کھڑگے اور کے سی وینوگوپال بھی موجود تھے۔


دہلی میں کم از کم درجہ حرارت 3.7 ڈگری درج

دہلی میں آج بھی درجہ حرارت کافی کم درج کیا گیا ہے۔ لودی روڈ میں جہاں درجہ حرارت 3.7 ڈگری درج کیا گیا، وہیں پالم میں درجہ حرارت 4.1 ڈگری سلسیس درج کیا گیا۔ دہلی اور اس کے قرب و جوار میں ٹھنڈ میں لگاتار اضافہ ہوتا جا رہا ہے اور سرد لہر بھی چل رہی ہے۔ اس بڑھتی سردی کی وجہ سے لوگوں نے خود کو گھروں میں قید رکھنا شروع کر دیا ہے۔ دفاتر میں کام کرنے اور ضروری کام سے ہی لوگ باہر نکل رہے ہیں۔


آدھار کارڈ کے ساتھ PAN لنک کرنے کی تاریخ ایک بار پھر بڑھی

پین (PAN) اور آدھار لنکنگ کی طے شدہ مدت میں ایک بار پھر اضافہ کر دیا گیا ہے۔ میڈیا ذرائع سے موصول ہو رہی خبروں کے مطابق اب 31 مارچ 2020 تک آدھار کارڈ سے پین کو لنک کرایا جا سکتا ہے۔ اس سے قبل لوگوں کو بتایا گیا تھا کہ آدھار کارڈ سے پین لنک کرنے کی آخری تاریخ 31 دسمبر 2019 ہے، جو کہ آج ختم ہو رہی تھی۔


یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-

اپنی رائے یہاں لکھیں

Discover more from ورق تازہ

Subscribe now to keep reading and get access to the full archive.

Continue reading