منریگا میں مودی حکومت کی تبدیلی دیہی غریبوں کے پیٹ پر لات مارنے کے مترادف: کُماری شیلجا
نیشنل ہیرالڈ معاملہ میں سونیا گاندھی اور راہل گاندھی کی بدنامی، نریندر مودی اور امیت شاہ استعفیٰ دیں
ممبئی: آل انڈیا کانگریس کمیٹی کی جنرل سیکریٹری اور رکنِ پارلیمنٹ کُماری شیلجا نے منریگا اسکیم میں مودی حکومت کی جانب سے کی گئی حالیہ تبدیلیوں پر شدید تنقید کرتے ہوئے کہا ہے کہ نام نہاد ’اصلاحات‘ کے نام پر کروڑوں دیہی غریبوں سے ان کا آئینی حقِ روزگار چھینا جا رہا ہے۔ ان کے مطابق منریگا کا نام بدلنا محض ایک انتظامی فیصلہ نہیں بلکہ مہاتما گاندھی، گرام سوراج کے تصور اور محنت کشوں کے وقار کی توہین ہے۔ یہ قدم دیہی غریب خاندانوں کے ساتھ سنگین ناانصافی کے مترادف ہے اور دیہات میں بسنے والے غریبوں کے پیٹ پر براہِ راست وار ہے۔
ممبئی کانگریس دفتر میں منریگا اور نیشنل ہیرالڈ سے متعلق ایک پریس کانفرنس سے خطاب کرتے ہوئے کُماری شیلجا نے کہا کہ یہ اسکیم سونیا گاندھی کی دور اندیش قیادت اور ڈاکٹر منموہن سنگھ کی حکومت کے دور میں اس لیے شروع کی گئی تھی تاکہ غریبوں کو ان کے حق کا روزگار مل سکے۔ منریگا کے ذریعے 100 دن کے روزگار کی ضمانت دی گئی، جو ملک کی ایک تاریخی اور سماجی انصاف پر مبنی اسکیم ہے۔ انہوں نے کہا کہ وزیراعظم نریندر مودی کو یہ اسکیم ابتدا سے ہی ناگوار گزرتی رہی اور پارلیمنٹ میں اسے محض گڑھے کھودنے کا کام قرار دے کر کانگریس کا زندہ یادگار کہا گیا۔ تاہم کووڈ وبا کے دوران یہی منریگا لاکھوں غریب خاندانوں کے لیے سہارا بنی۔ آج مودی حکومت اس اسکیم کے ذریعے نہ صرف مہاتما گاندھی کا نام مٹانے کی کوشش کر رہی ہے بلکہ غریبوں کی روزی روٹی بھی چھین رہی ہے، جو ایک انتہائی سنگین ناانصافی ہے۔
نیشنل ہیرالڈ معاملے پر بات کرتے ہوئے کُماری شیلجا نے کہا کہ مودی حکومت نے کانگریس پارٹی کو بدنام کرنے کے مقصد سے جانچ ایجنسیوں کا سیاسی ہتھیار کے طور پر استعمال کیا۔ برسوں تک کسی جرم کے بغیر سونیا گاندھی اور راہل گاندھی کو جان بوجھ کر نشانہ بنایا گیا، میڈیا ٹرائل کیا گیا اور تفتیش کے نام پر انہیں ہراساں کیا گیا۔ تاہم معزز عدالت نے اس شکایت کو سنجیدگی سے لینے سے انکار کرتے ہوئے عرضی خارج کر دی، جس سے یہ واضح ہو گیا کہ یہ پورا معاملہ قانون نہیں بلکہ سیاسی انتقام پر مبنی تھا۔
انہوں نے کہا کہ عدالت کا یہ فیصلہ بی جے پی حکومت کی جانب سے اداروں کے غلط استعمال، تفتیشی ایجنسیوں کو سیاسی ہتھیار بنانے اور اپوزیشن کی آواز دبانے کی سیاست پر ایک زوردار طمانچہ ہے۔ کُماری شیلجا نے مطالبہ کیا کہ سونیا گاندھی، راہل گاندھی اور کانگریس پارٹی کی بلا وجہ بدنامی پر وزیراعظم نریندر مودی اور مرکزی وزیر داخلہ امیت شاہ کو اخلاقی ذمہ داری قبول کرتے ہوئے فوری استعفیٰ دینا چاہیے۔
MRCC Urdu News 21 Dec. 25.docx
