منی پور تشدد پر وزیر اعظم کی خاموشی تشویشناک
لوک سبھا انتخابات میں مہاراشٹر سے سب سے زیادہ کانگریس کے ایم پی منتخب ہونگے: ناناپٹولے
ہمت ہے تو ممبئی میونسپل کارپوریشن میں 25 سال کے کام کی ایس آئی ٹی سے جانچ کرائیں
ریاستی کانگریس کے شیڈیولڈ کاسٹ ڈپارٹمنٹ کی ایگزیکٹو میٹنگ کا انعقاد
ممبئی:ہندوستان کا آئین تو آزادی کے بعد بنا لیکن اس آئین کا بیج آزادی سے پہلے کراچی کے کنونشن میں بویا گیا، جب ہم نے سوچا کہ آزادی کے بعد ملک کیسا ہو گا۔ہم نے ایک ایسا ملک بنانے کا سوچا جو تمام مذاہب کے لوگوں کو ساتھ لے کر چل سکے اور اس بنیادی منتر کے ساتھ آئین کا بیج بویا گیا۔ حالانکہ گزشتہ چند سالوں سے مرکزی حکومت آئین کے اصولوں کو نظر انداز کرتے ہوئے ملک پر من مانی حکومت کر رہی ہے۔ اگر ملک کے آئین کی حفاظت کرنی ہے تو لوگوں کے پاس کانگریس کے علاوہ کوئی متبادل نہیں ہے۔یہ باتیں آل انڈیا کانگریس کمیٹی کے جنرل سکریٹری مکل واسنک نے کہی ہیں۔
واسنک منگل کو تلک بھون میں مہاراشٹر پردیش کانگریس کمیٹی شیڈولڈ کاسٹ ڈویژن کی ایگزیکٹو میٹنگ میں بطور مہمان خصوصی خطاب کر رہے تھے۔ اس موقع پر کانگریس کے ریاستی صدر نانا پٹولے، سابق وزیر اور ممبئی کانگریس کی صدر ورشا گائیکواڑ، ایس سی ڈیویژن کے ریاستی صدر سدھارتھ ہتی امبیرے، سابق وزراء سریش شیٹی، انیس احمد، ریاستی جنرل سکریٹری دیوانند پوار، نائب صدر سنجے راٹھوڑ، بی ای نگرالے، پروفیسر پرکاش سوناونے، اشونی کھوبراگڑے سمیت ریاست بھر کے عہدیداران موجود تھے۔
اس موقع پر خطاب کرتے ہوئے مکل واسنک نے کہا کہ آج ملک کے سامنے سب سے بڑا چیلنج مرکز میں بی جے پی حکومت ہے۔ یہ حکومت پارلیمنٹ کو چلنے نہیں دے رہی۔ پارلیمنٹ کو چلانا حکومت کی ذمہ داری ہے لیکن بی جے پی حکومت اس سے بھاگ رہی ہے۔ مرکز کی بی جے پی حکومت او بی سی، ایس سی، ایس ٹی کے فلاحی فنڈ میں مسلسل کٹوتی کر رہی ہے۔ پسماندہ طبقات کے لیے بنائی گئی اسکیموں پر عمل نہیں ہو رہا ہے۔ واسنک نے کہا کہ مرکز میں کانگریس کی حکومت بننے کے بعد پسماندہ طبقات کے مسائل کو حل کرنے کے لیے ایک الگ وزارت شروع کی جائے گی، اس کے ساتھ ہی بجٹ میں آبادی کے تناسب سے ضروری فنڈز کی فراہمی کی جائے گی۔
اس موقع پر خطاب کرتے ہوئے ریاستی صدر نانا پٹولے نے کہا کہ 2014 کے بعد ملک اور ریاست میں ہندوتوا کے نام پر سیاست کی ایک الگ مشق شروع ہو گئی ہے، شاہو، پھلے اور امبیڈکر کے سماج میں مذہبی ماحول کو خراب کرنے کا کام چل رہا ہے۔پٹولے نے لوگوں سے اپیل کی کہ وہ بی جے پی کی اس سازش کا شکار نہ ہوں۔ انہوں نے کہا کہ مہاراشٹر کانگریس ہمیشہ عوام کے مسائل کو مضبوطی سے اٹھاتی رہی ہے۔ مودی جھوٹے وعدے کر کے اقتدار میں آئے ہیں اور اب لوگوں کو اس غلطی کا احساس ہو گیا ہے اس لیے ہم سب کو پورا یقین ہے کہ عوام 2024 کے انتخابات میں دوبارہ ایسی غلطی نہیں کریں گے۔انہوں نے کہا کہ 2024 کے انتخابات میں ریاست سے کانگریس کے سب سے زیادہ ممبران پارلیمنٹ منتخب ہوں گے۔
پٹولے نے مزید کہا کہ آئین نے ہمیں ریزرویشن دیا ہے لیکن بی جے پی حکومت مختلف طریقوں سے ریزرویشن کے اس ہتھیار کو ختم کررہی ہے۔ مرکزی حکومت بڑی سرکاری کمپنیوں کو صنعت کاروں کو بیچ رہی ہے،جس کی وجہ سے ریزرویشن ختم ہو رہا ہے۔سرکاری ملازمین کی بھرتی بھی نہیں ہو رہی ہے۔ کانگریس کے ریاستی صدر نے کہا کہ اگر ہم اس پر قابو پانا چاہتے ہیں تو ذات کے لحاظ سے مردم شماری بہت ضروری ہے، تب ہی سماج کو ڈاکٹر بابا صاحب کی سوچ کے مطابق بنایا جا سکتا ہے۔
اس موقع پر خطاب کرتے ہوئے ممبئی کانگریس کی صدر ورشا گائیکواڑ نے کہا کہ ہمارے سامنے لڑائی بڑی ہے۔ بی جے پی کی حکومت برسراقتدار ہے۔ باباصاحب کے افکار کو تباہ کرنے کی کوشش ہورہی ہے۔ پسماندہ طبقات کے مسائل زیر التوا ہیں۔ حکومت پسماندہ طبقے کے طلبہ کے لیے اسکالر شپ، رہائش کے مسائل پر فیصلہ نہیں لے رہی ہے، اس کے بارے میں صرف یقین دہانیاں کر رہی ہے، ریاست میں پسماندہ طبقات پر حملے ہو رہے ہیں لیکن حکومت کچھ نہیں کر رہی ہے۔ انہوں نے کہا کہ آنے والے وقت میں ہم سب کو چوکس رہنا ہو گا اورسماج میں بدامنی پھیلانے والوں کو منہ توڑ جواب دینا ہو گا۔
دیکشا بھومی سے چیتیہ بھومی تک ’سنویدھان گورو یاترا‘
ریاستی کانگریس کے شیڈول کاسٹ شعبے کے صدر سدھارتھ ہتی امبیرے نے کہا کہ ریاست میں اے سی سی طبقہ ہمیشہ کانگریس پارٹی کے ساتھ مضبوطی سے کھڑا رہا ہے۔ ہم آنے والے انتخابات میں سخت محنت کریں گے اور کانگریس کو نمبر ایک پارٹی بنا کر سونیا گاندھی، راہل گاندھی اور ملکارجن کھڑگے کے ہاتھ کو مضبوط کریں گے۔ اس وقت ملک اور مہاراشٹر میں منو وادی نظریات کی حکومت ہے اور اس کی وجہ سے آئین خطرے میں ہے۔ جلد ہی آئین اور ملک کی حفاظت کے پیغام کے ساتھ دیکشا بھومی سے چیتیہ بھومی تک سنویدھان گورو یاترا نکالی جائے گی اور اس یاترا کے دوران ہر ضلع میں آئین کی دو ہزار کاپیاں تقسیم کی جائیں گی۔
منی پور تشدد پر وزیر اعظم کی خاموشی تشویشناک
مکل واسنک نے کہا کہ منی پور پچھلے 45 دنوں سے جل رہا ہے۔ وہاں کے حالات بہت خوفناک ہیں۔ امن و امان مکمل طور پر تباہ ہو چکا ہے۔ لیکن اس کے بعد پہلے 25 دنوں تک مرکزی حکومت کے کسی نمائندے نے منی پور کا دورہ نہیں کیا۔ 25 دن کے بعد مرکزی وزیر داخلہ نے دورہ کیا اور 15 دن کا وقت مانگا، لیکن منی پور کے لوگوں نے ان پر یقین نہیں کیا۔ منی پور میں ڈبل انجن والی حکومت ناکام ہو چکی ہے۔ تھانے پر حملہ کر کے اسلحہ لوٹا جا رہا ہے۔ سابق مرکزی وزیر مکل واسنک نے کہا ہے کہ منی پور میں زبردست افراتفری ہے لیکن ملک کے وزیر اعظم منی پور میں امن کو یقینی بنانے کے لیے ایک لفظ بھی نہیں بول رہے ہیں، جو بہت تشویشناک ہے۔
