نانا پٹولے کا الیکشن کمیشن کو مکتوب، رشمی شکلا کو ڈی جی پی کے عہدے سے ہٹانے کا مطالبہ
ممبئی: رشمی شکلا کو ریاست کے پولیس ڈائریکٹر جنرل کے طور پر غیر قانونی طور پر توسیع دی گئی ہے۔ شکلا پر کئی لیڈران کے فون ٹیپنگ سمیت سنگین الزامات عائد ہیں۔ یہ بات کانگریس صوبائی صدر نانا پٹولے نے کہی ہے۔ انہوں نے دعویٰ کیا کہ رشمی شکلا بی جے پی کے لیے کام کرتی ہیں۔ نانا پٹولے نے الیکشن کمیشن کو ایک اور یاد دہانی خط لکھا ہے اور ایک بار پھر رشمی شکلا کو پولیس ڈائریکٹر جنرل کے عہدے سے ہٹانے کا مطالبہ کیا ہے۔ ان کا کہنا ہے کہ ایسے جانبدار افسران کو فوری طور پر برطرف کیا جانا چاہیے، کیونکہ ان افسران کی وجہ سے خدشہ ہے کہ اسمبلی انتخابات شفاف اور منصفانہ طریقے سے منعقد نہیں ہوں گے۔
24 ستمبر کو کانگریس کے صوبائی صدر نے ملک کے چیف الیکشن کمشنر کو ایک خط لکھ کر پولیس ڈائریکٹر جنرل رشمی شکلا کو ہٹانے کا مطالبہ کیا تھا۔ جب چیف الیکشن کمشنر ریاست کے دورے پر تھے تو کانگریس کے وفد نے بھی رشمی شکلا کو ہٹانے کا مطالبہ کیا تھا، لیکن ابھی تک اس پر کوئی کارروائی نہ ہونے کی وجہ سے نانا پٹولے نے الیکشن کمیشن کو ایک یاد دہانی خط بھیجا ہے۔ اس یادداشت میں نانا پٹولے نے مزید کہا ہے کہ حال ہی میں مہاراشٹر کے پولیس ڈائریکٹر جنرل کے طور پر رشمی شکلا کی تقرری اور ان کی مدت میں توسیع قانونی تقاضوں اور عمل کی خلاف ورزی ہے۔ ریاستی حکومت نے ریٹائرمنٹ کے بعد بھی رشمی شکلا کو توسیع دے کر مہاراشٹر پولیس ایکٹ کی صریح خلاف ورزی کی ہے۔ ریاستی حکومت نے شکلا کو دی گئی توسیع کی حمایت میں سپریم کورٹ کی جانب سے پرکاش سنگھ کیس میں دیے گئے فیصلے کا حوالہ دیا ہے، لیکن سپریم کورٹ کا فیصلہ صرف پولیس سربراہ کے عہدے کی مدت مقرر کرنے کے لیے تھا اور ریاستی حکومت نے اس فیصلے کی غلط تشریح کی ہے۔ نانا پٹولے کا ماننا ہے کہ رشمی شکلا کو توسیع دینے کا فیصلہ ملک میں ایک خطرناک مثال قائم کر سکتا ہے۔ سینئر پولیس افسران کی تقرری کے لیے یونین پبلک سروس کمیشن (یو پی ایس سی) کے مقرر کردہ معیارات کو نظر انداز کرتے ہوئے اس قسم کی توسیع سے ایک غلط رجحان کی شروعات ہو سکتی ہے۔ اس بات کا خدشہ ہے کہ مستقبل میں دوسرے ریاستوں میں بھی اس طرح کی تقرریاں ہوں گی۔
نانا پٹولے نے کہا کہ یہ واضح ہے کہ رشمی شکلا کو توسیع دینے کا فیصلہ جلد بازی میں کیا گیا تھا اور شفافیت کی کمی کے باعث حکومت کی حکمرانی پر سوالات اٹھ گئے ہیں۔ اسمبلی انتخابات سے پہلے متنازعہ پولیس افسر رشمی شکلا کی سروس کی توسیع پر شکوک پیدا ہو گئے ہیں۔ ریاستی حکومت کا یہ فیصلہ سیاسی طور پر محرک ہے اور انتخابی عمل کو متاثر کرتا ہے۔ اس طرح ایک متنازعہ افسر کی مدت ملازمت میں توسیع کرنا حکومت کی غیر جانبداری اور اعتماد کو مزید کمزور کرتا ہے۔ نانا پٹولے نے الیکشن کمیشن سے مطالبہ کیا ہے کہ رشمی شکلا کو دی گئی سروس میں توسیع کا فوری جائزہ لیا جائے اور اس پر فوری کارروائی کی جائے۔