نیو اندرا نگر کے متاثرین کو متبادل مکانات، چابیاں تقسیم
سٹیس پل پروجیکٹ متاثرین کو راحت، عوامی نمائندوں کا یقین دہانی
تھانے (آفتاب شیخ)
تھانے کے کوپری ڈویژن کے نیو اندرا نگر علاقے میں سٹیس پل پروجیکٹ سے متاثرہ خاندانوں کو بالآخر راحت مل گئی ہے اور انہیں متبادل مکانات فراہم کیے گئے ہیں۔ نائب وزیر اعلیٰ ایکناتھ شندے کی ہدایت اور رکن پارلیمنٹ نریش مہسکے کی مسلسل پیروی کے نتیجے میں متاثرہ شہریوں کو ایکمی، کھیورا سرکل، مانپاڑا میں متبادل رہائش دی گئی۔ بدھ کے روز آننداشرم میں منعقدہ تقریب میں ایم پی نریش مہسکے اور میئر شرمیلا پمپولکر نے مقامی کارپوریٹر مالتی پاٹل کے ہمراہ متاثرین میں گھروں کی چابیاں تقسیم کیں۔
واضح رہے کہ کوپری کے نیو اندرا نگر علاقے میں ریلوے انتظامیہ کی کارروائی کے بعد شہریوں میں خوف و بے چینی کا ماحول پیدا ہو گیا تھا، تاہم مقامی عوامی نمائندوں نے موقع پر پہنچ کر مکینوں کو یقین دلایا اور ان کے مسائل کے حل کے لیے مسلسل کوششیں کیں۔ اس ضمن میں میئر شرمیلا پمپولکر، مالتی پاٹل، نمرتا پمنانی اور بھرت چوان نے اہم کردار ادا کیا اور نائب وزیر اعلیٰ ایکناتھ شندے و ایم پی نریش مہسکے کے ساتھ رابطہ قائم رکھتے ہوئے متاثرین کے لیے متبادل مکانات کی فراہمی کو یقینی بنایا۔
بدھ کو ٹیمبھی ناکہ کے آننداشرم میں منعقدہ تقریب کے دوران ایم پی نریش مہسکے نے 10 متاثرہ خاندانوں کو چابیاں پیش کیں، جبکہ دیگر رہائشیوں میں میئر شرمیلا پمپولکر، ہاؤس لیڈر ہنمنت جگدالے، سینئر کارپوریٹر رام ریپالے اور کارپوریٹر مالتی پاٹل نے چابیاں تقسیم کیں۔ اس موقع پر متاثرہ شہریوں نے متبادل رہائش فراہم کرنے پر عوامی نمائندوں اور انتظامیہ کا شکریہ ادا کیا۔ تقریب میں روہت پمپولکر، رماکانت پاٹل، سنتوش ستکر اور وکاس پاٹل سمیت متعدد شہری موجود تھے۔
