مہاراشٹر کی نئی رہائشی پالیسی میں سستے، پائیدار اور ماحول دوست گھروں پر زور
مل مزدوروں کے لیے ایک لاکھ گھر، بزرگ شہریوں کے لیے خصوصی رہائشی اسکیم، ممبئی کے رک گئے بحالی منصوبوں کو تیز کیا جائے گا
(آفتاب شیخ)
سہیادری گیسٹ ہاؤس میں نائب وزیر اعلیٰ شندے کی زیر صدارت رہائشی شعبہ کا جائزہ اجلاس منعقد ہوا۔ تقریباً تین گھنٹے تک جاری رہنے والے اس اجلاس میں نائب وزیر اعلیٰ نے مختلف منصوبوں اور پروجیکٹس کا تفصیلی جائزہ لیا۔
سب کے لیے گھر" کی اہم اسکیم کو عملی طور پر لانے کے لیے ریاست کی نئی رہائشی پالیسی میں سستے، پائیدار اور ماحول دوست گھروں پر زور دیا جائے گا۔ اس سلسلے میں تفصیلی پالیسی ایک مہینے کے اندر تیار کی جائے گی تاکہ شہریوں کو مہاڈا اور رہائشی شعبہ کی سکیموں کا آسانی سے فائدہ مل سکے۔ اس کے لیے آن لائن پلیٹ فارمز کا استعمال کیا جائے گا۔ ممبئی کے رکے ہوئے بحالی منصوبوں کو تیز رفتار بنانے کے لیے نائب وزیر اعلیٰ ایکناتھ شندے نے آج یہاں ہدایات دیں۔
ریاستی حکومت کے ذریعے مل مزدوروں کے لیے تقریبا ایک لاکھ گھر بنائے جائیں گے۔ ممبئی کی ترقی کے لیے جلد ہی کلسٹر اسکیم شروع کی جائے گی جس کے ذریعے ممبئی میں لاکھوں گھر دستیاب ہوں گے، نائب وزیر اعلیٰ ایکناتھ شندے نے آج یہاں یقین ظاہر کیا۔
اس اجلاس میں ہاوسنگ ڈپارٹمنٹ کی ایڈیشنل چیف سیکریٹری ولشا نائر سنگھ، دھاراوی بحالی پروجیکٹ کے چیف ایگزیکٹیو آفیسر ایس وی آر. شری نیواسی، شہری ترقیات محکمہ کے پرنسپل سیکریٹری عاصم گپتا، مہاڈا کے نائب صدر اور چیف ایگزیکٹیو آفیسر سنجیو جیسوال، ممبئی جھوپڑ پٹی بحالی اتھارٹی کے چیف ایگزیکٹیو آفیسر ڈاکٹر مہندر کلیانکر، ممبئی ہاوسنگ و ایریا ڈیولپمنٹ بورڈ کے چیف افسر ملند بوریکر، ممبئی عمارت مرمت و بحالی بورڈ کے چیف افسر ملند شمبھرکر، اور محکمہ کے دیگر سینئر افسران موجود تھے۔
نائب وزیر اعلیٰ شندے نے کہا کہ بزرگ شہریوں کے لیے رہائشی پالیسی نافذ کرنے والا مہاراشٹر پہلا ریاست بننے جا رہا ہے۔ اس پالیسی کے تحت طلباء کے لیے ہوسٹل، کام کرنے والی خواتین کے لیے ہوسٹل، مزدوروں کے لیے گھر، کرایے پر مکانات، بحالی، ماحول دوست مکانات، جدید ٹیکنالوجی کے ذریعے گھروں کی تعمیر کی جائے گی۔ ریاست میں مختلف ہاوسنگ اداروں کے ذریعے گھروں کے متعدد منصوبے چلائے جا رہے ہیں۔ ممبئی کے یہ زیر التوا رہائشی منصوبے تیز کرنے ہوں گے۔
مل مزدوروں کے لیے ایک لاکھ گھر بنائے جائیں گے اور اس کی ٹینڈر پروسیس مکمل ہو چکی ہے۔ جو مل مزدور اپنے اصلی گاؤں منتقل ہو چکے ہیں ان کے گاؤں میں گھروں کی فراہمی کے بارے میں تحقیقات کی جائیں اور مل مزدور یونین کے ساتھ اجلاس بھی بلایا جائے، نائب وزیر اعلیٰ شندے نے اس موقع پر ہدایات دیں۔
ممبئی میں جھوپڑ پٹی بحالی اور دیگر رک گئے منصوبے شروع کیے جائیں گے۔ اس کے لیے جھوپڑ پٹی بحالی اسکیم کو فروغ دیا جائے گا اور یہ منصوبے مکمل کر کے ممبئی کو جھوپڑ پٹی سے آزاد کیا جائے گا۔ ایم ایم آر ڈی اے اور جھوپڑ پٹی بحالی اتھارٹی کے ذریعے ماں رامبائی امبیڈکر نگر اور کامراج نگر کی جھوپڑیوں کی بحالی کی جا رہی ہے۔ رہائشی امور کے لیے ایک مرکزی، شفاف اور ویب پر مبنی ریاستی رہائشی معلومات پورٹل تیار کیا جائے گا، اور خطرناک عمارتوں میں رہائش پذیر افراد کے لیے ٹرانزٹ کیمپ بنائے جائیں گے، نائب وزیر اعلیٰ شندے نے اس سلسلے میں تفصیلی پالیسی تیار کرنے کی ہدایات دیں۔
اس اجلاس میں نائب وزیر اعلیٰ نے بی ڈی ڈی چال بحالی پروجیکٹ، پتراچال بحالی پروجیکٹ، موتی لال نگر ۱، ۲، اور ۳ کی بستیاں، کماٹی پورہ علاقے کی مہاڈا کے ذریعے بحالی، پولیس کے لیے گھر، مل مزدوروں کے لیے گھر اسکیم، جی ٹی بی نگر سوئم میں بحالی پروجیکٹ، وزیراعظم آواس یوجنا وغیرہ کا جائزہ لیا۔
اس اجلاس میں ہاوسنگ ڈپارٹمنٹ کی ایڈیشنل چیف سیکریٹری ولشا نائر سنگھ نے پیشکش کے ذریعے شعبہ کی معلومات فراہم کی۔
