سیول:َ(ایجنسیز)شمالی کوریا اور جنوبی کوریا کے درمیان کشیدگی مسلسل بڑھتی جا رہی ہے اور دونوں ممالک جنگ کی طرف بڑھتے دکھائی دے رہے ہیں۔ تازہ ترین خبروں کے مطابق شمالی کوریا کے لیڈر کم جونگ اُن کی بہن کم یو جونگ نے جنوبی کوریا سے ملحقہ سرحد کا دورہ کیا ہے۔ اس دوران انھوں نے ان علاقوں کا جائزہ لیا جہاں شمالی کوریا کے فوجی سرحد پر حفاظتی انتظامات کو مزید مضبوط کر رہے ہیں۔
کم یو جونگ نے خبردار کیا کہ اگر جنوبی کوریا نے سرحد پر جاری اس کام میں کسی بھی طرح کی اشتعال انگیز کارروائی کی تو شمالی کوریا اس کا سخت جواب دے گا۔قابل ذکر ہے کہ دونوں ممالک کے درمیان گزشتہ ماہ پیش آنے والے ایک واقعہ کے بعد سے کشیدگی بڑھی ہوئی ہے۔ دراصل سرحد پر بچھائی گئی بارودی سرنگوں میں دھماکوں سے جنوبی کوریا کے 3 فوجی زخمی ہو گئے تھے۔ جنوبی کوریا کی فوج نے الزام لگایا تھا کہ یہ سرنگیں شمالی کوریا کی فوج نے بچھائی تھیں۔ جنوبی کوریا نے اس ماہ کے آغاز میں امریکہ کی قیادت والی اقوام متحدہ کی کمان کے ساتھ تحقیقات کرنے کے بعد 21 ستمبر کو سرحد پر ہونے والے دھماکوں کے لیے باضابطہ طور پر شمالی کوریا کو ذمہ دار ٹھہرایا تھا۔
سیول نے شمالی کوریا سے اس واقعہ کے لیے معافی مانگنے اور سرحد پر بچھائی گئی باقی بارودی سرنگوں کو ہٹانے کا مطالبہ کیا تھا۔ حالانکہ شمالی کوریا نے ان دھماکوں میں اپنے کسی بھی کردار سے انکار کیا تھا۔ ساتھ ہی اس نے خبردار کیا تھا کہ اگر اسے اکسایا گیا تو وہ سخت جوابی کارروائی کرے گا۔ شمالی کوریا کی سرکاری خبر رساں ایجنسی کورین سینٹرل نیوز ایجنسی (کے سی این اے) کے مطابق کم یو جونگ نے منگل کو کورین پیپلز آرمی کے مارشل پاک جونگ چون کے ساتھ سرحدی علاقوں کا دورہ کیا۔ پاک جونگ چون شمالی کوریا کے لیڈر کم جونگ اُن کے اعلیٰ فوجی افسران میں شامل ہیں۔اس دوران کم یو جونگ نے سرحد کو مزید مضبوط بنانے کے کام کو ایک عظیم مہم قرار دیا۔ انھوں نے کہا کہ یہ مہم کم جونگ اُن کی اس پالیسی کا حصہ ہے جس کے تحت جنوبی کوریا کے ساتھ تمام تعلقات ہمیشہ کے لیے ختم کرنا ہے۔ کم جونگ اُن پہلے ہی جنوبی کوریا کو اپنا سب سے بڑا دشمن قرار دے چکے ہیں۔ امریکہ کے ساتھ سفارتی بات چیت میں جاری تعطل کے درمیان شمالی کوریا نے جنوبی کوریا کے خلاف اپنا موقف مزید سخت کرلیا ہے۔ کم یو جونگ نے الزام لگایا کہ جنوبی کوریا کی فوج سرحد پر حفاظتی انتظامات مضبوط کرنے والے شمالی کوریا کے فوجیوں پر انتباہی فائرنگ کر رہی ہے اور لاؤڈ اسپیکروں کے ذریعے انھیں خبردار کر رہی ہے۔ جنوبی کوریا کے جوائنٹ چیفس آف اسٹاف کے چیئرمین جن یونگ سونگ نے بھی کم یو جونگ کی دھمکی کو ناقابل برداشت قرار دیا۔ انھوں نے فوج کو حکم دیا کہ شمالی کوریا کی جانب سے کسی بھی ممکنہ اشتعال انگیز کارروائی کا سختی سے جواب دیا جائے۔
بھگدڑ: بنگال حکومت نے تحقیقات کے لیے ایس آئی ٹی تشکیل دی
3 ماہ رپورٹ پیش کرنی ہوگی
مغربی بنگال حکومت نے کولکاتا کے چورباگان عوامی درگا پوجا پنڈال کے قریب 17 اکتوبر کو ہوئی بھگدڑ کی جامع تحقیقات کے لیے خصوصی تحقیقاتی ٹیم (ایس آئی ٹی) تشکیل دی ہے۔ ریاستی حکومت نے کلکتہ ہائی کورٹ کے مشورے سے تشکیل دی گئی اس ٹیم کو واقعے کی وجوہات کا پتہ لگانے، ممکنہ لاپرواہی کی جانچ کرنے اور مستقبل میں ایسے واقعات کو روکنے کے لیے تجاویز دینے کی ذمہ داری سونپی ہے۔ ایس آئی ٹی کو حکم جاری ہونے کی تاریخ سے 3 ماہ کے اندر اپنی رپورٹ ریاستی حکومت کو پیش کرنی ہوگی۔مغربی بنگال حکومت کے چیف سکریٹری منوج کمار اگروال کی جانب سے 21 اکتوبر کو جاری کردہ حکم کے مطابق ریٹائرڈ جج انندیتا رائے سرسوتی ایس آئی ٹی کی سربراہ ہوں گی۔ اس کے علاوہ ریاست کے محکمۂ آفات سے نمٹنے اور شہری تحفظ کے پرنسپل سکریٹری، اسپیشل ٹاسک فورس (ایس ٹی ایف) کے ڈائریکٹر جنرل اور انسپکٹر جنرل آف پولیس، مغربی بنگال کے ڈائریکٹر جنرل اور انسپکٹر جنرل آف پولیس کا ایک نمائندہ، محکمۂ داخلہ و پہاڑی امور کا ایک نمائندہ اور کولکاتہ میں نیشنل ڈیزاسٹر رسپانس فورس (این ڈی آر ایف) کا ایک نمائندہ اس کے اراکین ہوں گے۔حکم کے مطابق ایس آئی ٹی ضرورت پڑنے پر ریاستی حکومت سے کسی دوسرے افسر کو بھی تحقیقاتی ٹیم میں شامل کرنے کی درخواست کر سکتی ہے۔ ایس آئی ٹی کو یہ پتہ لگانے کی ذمہ داری سونپی گئی ہے کہ 17 اکتوبر کو چورباگان عوامی درگا پوجا پنڈال کے قریب کن حالات میں بھگدڑ ہوئی۔ تحقیقاتی ٹیم واقعے کے وقت، مقام اور پورے سلسلے کی جانچ کرے گی۔ اس کے ساتھ ہی یہ بھی پتہ لگایا جائے گا کہ بھیڑ کا دباؤ اچانک کیسے بڑھا اور کس طرح یہ بھگدڑ میں تبدیل ہو گیا۔
اسٹیون اسمتھ کے ٹیسٹ کرکٹ میں 11 ہزار رن مکمل، یہ کارنامہ انجام دینے والے دنیا کے 12ویں بلے باز
گکیبرہا:آسٹریلیا کے اسٹار بلے باز اسٹیون اسمتھ نے ٹیسٹ کرکٹ میں ایک اور بڑی کامیابی حاصل کر لی ہے۔ جنوبی افریقہ کے خلاف گکیبرہا میں کھیلے جا رہے دوسرے ٹیسٹ میچ کے دوران اسمتھ نے ٹیسٹ کرکٹ میں 11 ہزار رن مکمل کر لیے۔ وہ اس مقام تک پہنچنے والے آسٹریلیا کے تیسرے اور دنیا کے 12ویں بلے باز بن گئے ہیں۔ حالانکہ اسمتھ کے اس انفرادی ریکارڈ کے درمیان آسٹریلیا کی ٹیم پہلی اننگ میں محض 99 رن پر آل آؤٹ ہو گئی۔ اس کے بعد جنوبی افریقہ نے آسٹریلیا کو فالو آن دے دیا۔37 سالہ اسٹیون اسمتھ نے سینٹ جارج پارک میں آسٹریلیا کی پہلی اننگ کے دوران 88 گیندوں پر 28 رنز رن بنائے۔ ان کی اننگ میں 2 چوکے شامل تھے۔ ویان ملڈر نے انہیں بولڈ کر کے پویلین بھیج دیا۔ اسمتھ نے اپنے ٹیسٹ کیریئر کی 226ویں اننگ میں 11 ہزار رن کا ہندسہ عبور کیا۔
وہ اس سنگ میل تک سب سے کم اننگ میں پہنچنے والے بلے بازوں کی فہرست میں پانچویں مقام پر ہیں۔