ریاست میں آئندہ تین دنوں تک غیر موسمی بارش اور ژالہ باری کا امکان

ممبئی:1/ اپریل ۔ (ورق تازہ نیوز)ریاست کے کئی علاقوں میں منگل کو بے وقت بارش ہوئی۔ تیز ہواؤں کے ساتھ گرج چمک کے ساتھ کئی علاقوں میں بارش ہوئی، جبکہ کچھ مقامات پر اولے بھی گرے۔ محکمہ موسمیات نے اگلے تین دنوں میں ریاست کے مختلف حصوں میں بارش ہونے کا امکان ظاہر کیا ہے۔ بھارتی محکمہ موسمیات کے اہلکار ایس۔ ڈی۔ سنپ نے بتایا کہ وسطی مہاراشٹر میں ایک سائیکلون بننے کی وجہ سے بارش میں اضافہ ہوا ہے۔

ریاست میں پچھلے تین دنوں سے مطلع ابر آلود ہے۔ اس کے بعد کچھ جگہوں پر دوپہر سے بارش شروع ہوئی جس کے ساتھ بجلی کی گرج چمک بھی رہی۔ پونے محکمہ موسمیات کے اہلکار ایس۔ ڈی۔ سانپ نے کہا کہ کوکن علاقے میں بارش ہونے کا امکان ہے۔ 4 اور 5 اپریل کو ودربھ میں بارش ہونے کی پیش گوئی کی گئی ہے۔ علاوہ ازیں ستارا، جالنہ اور سمبھاجی نگر اضلاع میں اولے پڑنے کا امکان ظاہر کیا گیا ہے۔

مجموعی طور پر مہاراشٹر میں اگلے تین دنوں میں بارش ہونے کی توقع ہے۔ گھاٹ علاقوں کے ساتھ ساتھ شہروں میں بھی بارش ہو سکتی ہے۔ امراوتی سمیت مغربی ودربھ میں اگلے چار سے پانچ دنوں تک مطلع ابر آلود رہنے اور کچھ مقامات پر بے وقت بارش ہونے کا امکان ہے۔

ناندیڑ ضلع میں آئندہ دو دنوں تک یلو الرٹ جاری کیا گیا ہے۔ ممبئی کے علاقائی محکمہ موسمیات نے 2 اور 3 اپریل کو ناندیڑ کے لیے یلو الرٹ جاری کیا ہے۔ ساتھ ہی ناندیڑ کے کچھ علاقوں میں 40 سے 50 کلومیٹر فی گھنٹہ کی رفتار سے ہوائیں چلنے کی توقع ہے۔ ضلع میں بجلی کی گرج چمک کے ساتھ ہلکی سے درمیانی درجے کی بارش ہو سکتی ہے۔