بلند شہرکے انسپکٹر کو بجرنگ دل، بی جے پی، وی ایچ پی کارکنان نے قتل کیا ایف آئی آر درج 

بلند شہر۔4۔دسمبر۔۔بلند شہر کی سيانا کوتوالی میں تعینات انسپکٹر سبودھ کمار کے قتل معاملے میں چار ملزمان کو گرفتار کیا گیا ہے جبکہ چار افراد کو حراست میں لیا گیا ہے۔ اس سلسلے میں سيانا کوتوالی کے سب انسپکٹر سبھاش سنگھ نے رپورٹ درج کرائی ہے جس میں بجرنگ دل کے ضلع کنوینر یوگیش راج، بی جے پی یوا سيانا کے شہر صدر شکھر اگروال، وی ایچ پی کارکن اوپیندر راگھو کو بھی نامزد کیا گیا ہے۔اس معاملے میں پولیس نے دو الگ۔ الگ ایف آر بھی درج کی ہیں۔ ان میں سے ایک انسپکٹر سبودھ کمار کے قتل کے معاملے میں درج کی گئی ہے جس میں 28 افراد کو نامزد کیا گیا ہے جبکہ 60 نامعلوم افراد شامل ہیں۔ سبودھ کمار کے قتل کے معاملے میں بجرنگ دل کے رہنما یوگیش راج کو اہم ملزم بنایا گیا ہے۔

ملزم بجرنگ دل کے رہنما یوگیش راج

کہا جا رہا ہے کہ اسی نے سب سے پہلے گئوکشی کی شکایت کی تھی۔وہیں، دوسری ایف آئی آر مبینہ گئوکشی کے معاملہ میں درج کی گئی ہے جس میں 7 لوگوں کے نام ہیں۔ اس معاملہ کی جانچ ایس آئی ٹی اور اے ڈی جی انٹلیجنس کر رہے ہیں۔ ملزمین کو پکڑنے کے لئے پولیس کی چھ ٹیموں نے اب تک 22 ٹھکانوں پر چھاپہ ماری کی ہے۔بتا دیں کہ بلند شہر کے سیانا میں مبینہ طور پر گئوکشی کے شک میں پیر کے روز کافی ہنگامہ ہوا تھا۔ اس دوران پولیس پر پتھراو اور گولی باری کی گئی تھی۔ بھیڑ کے تشدد میں انسپکٹر سبودھ کمار کی موت ہو گئی تھی