اہم خَبر: اشوک لے لینڈ کی حالت خراب، کئی پلانٹوں میں کام بند، ہزاروں ملازمین متاثر

معاشی بحران: اشوک لے لینڈ کے ہزاروں ملازمین بے کار، کئی دنوں تک بند رہیں گے 5 بڑے پلانٹ

آٹو سیکٹر کی بڑی کمپنی اشوک لے لینڈ نے اپنے پانچ پلانٹوں کو کئی دنوں تک بند رکھنے کا اعلان کیا ہے۔ اس دوران کمپنی کے ہزاروں ملازمین گھر بیٹھیں گے۔ کمپنی نے پنت نگر پلانٹ کو 18 دن، بھنڈارا پلانٹ کو 10 دن، الور پلانٹ کو 10 دن، ہوسُر پلانٹ کو 5 دن اور اینور پلانٹ کو 16 دن بند رکھنے کا اعلان کیا ہے۔ واضح رہے کہ ہندوجا گروپ کی اہم کمپنی اشوک لے لینڈ کی کل فروختگی اگست میں 70 فیصد گھٹ کر 3336 ٹرک رہ گئی تھی۔ گزشتہ سال اسی مہینے میں کمپنی نے 11135 ٹرک فروخت کیے تھے۔

جموں و کشمیر میں نظر بند سی پی ایم لیڈر تاریگامی بغرض علاج دہلی کے ایمس میں داخل

جموں و کشمیر میں دفعہ 370 ہٹائے جانے کے وقت سے نظر بند سی پی ایم لیڈر تاریگامی کو دہلی لایا گیا ہے۔ دراصل وہ بیمار تھے اور سی پی ایم لیڈر سیتا رام یچوری نے ان سے سری نگر میں گزشتہ دنوں ملاقات کی تھی۔ بعد ازاں انھوں نے تاریگامی کی بیماری سے متعلق رپورٹ سپریم کورٹ میں پیش کی تھی۔ اس کے بعد عدالت عظمی نے حکم دیا تھا کہ تاریگامی کو سری نگر سے دہلی کے ایمس منتقل کیا جائے اور مناسب علاج کرایا جائے۔ اسی کے پیش نظر تاریگامی کو سری نگر سے دہلی لایا گیا ہے۔

یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-