ممبئی: مہاراشٹر کے مختلف علاقوں میں مانسون کی بارش نے زور پکڑ لیا ہے۔ ریاست کے متعدد اضلاع میں موسلادھار بارش اور تیز آندھی کے باعث بڑے پیمانے پر نقصان ہوا ہے۔ کئی مقامات پر درخت جڑ سے اکھڑ گئے، جبکہ مکانات اور دکانوں کی چھتوں کے پترے بھی ہوا میں اُڑ گئے۔
امراوتی شہر میں تیز ہواؤں کے ساتھ شدید بارش ریکارڈ کی گئی، جس کے نتیجے میں شہر بھر میں 20 سے زائد درخت گر پڑے۔ اہم شاہراہوں اور سڑکوں پر درخت گرنے سے ٹریفک کی روانی متاثر ہوئی اور شہریوں کو مشکلات کا سامنا کرنا پڑا۔
مقامی انتظامیہ اور میونسپل کارپوریشن کی ٹیمیں فوری طور پر حرکت میں آئیں اور سڑکوں پر گرے ہوئے درختوں کو ہٹانے کا کام جنگی بنیادوں پر شروع کر دیا۔ بعض علاقوں میں بجلی کی فراہمی بھی متاثر ہوئی، جبکہ کئی مقامات پر املاک کو نقصان پہنچنے کی اطلاعات موصول ہوئی ہیں۔
محکمہ موسمیات کے مطابق آئندہ چند روز کے دوران بھی ریاست کے مختلف حصوں میں تیز بارش، آندھی اور گرج چمک کا سلسلہ جاری رہ سکتا ہے۔ انتظامیہ نے شہریوں کو خراب موسم کے دوران غیر ضروری سفر سے گریز کرنے اور احتیاطی تدابیر اختیار کرنے کی اپیل کی ہے۔
بارش اور آندھی کے باعث متاثرہ علاقوں میں نقصانات کا جائزہ لیا جا رہا ہے، جبکہ امدادی اور بحالی کے کام تیزی سے جاری ہیں۔