کرناٹک کی طرح آئندہ انتخابات میں خواتین کی طاقت کا مظاہرہ کریں: نیتا ڈی سوزا
شندے-فڈنویس حکومت میں ممبئی اور مہاراشٹر میں خواتین غیر محفوظ: سندھیا سوالاکھے
ریاستی مہیلا کانگریس ایگزیکٹو کی جائزہ میٹنگ کا تلک بھون میں انعقاد
ممبئی:خواتین کی طاقت ملک کی ایک بڑی طاقت ہے اور وہ 50 فیصد آبادی کی نمائندگی کرتی ہیں۔ اگر خواتین ووٹنگ میں بڑی تعداد میں حصہ لیں تو مودی حکومت کی شکست یقینی ہے۔ مودی حکومت کے دوران مہنگائی بہت بڑھ گئی ہے اور اس مہنگائی کا سب سے پہلے سامنا خواتین کو کرنا پڑ رہا ہے۔ اس مہنگائی کی وجہ سے عام لوگوں کا جینا مشکل ہو گیا ہے۔ مہاراشٹر پردیش کانگریس کمیٹی کے صدر نانا پٹولے نے کہا ہے کہ مہیلا کانگریس کو اس معاملے پر جارحانہ موقف اختیار کرتے ہوئے مہنگائی کے حوالے سے مرکز کی مودی حکومت سے سخت سوالات پوچھنے چاہئیں۔
مہاراشٹر پردیش مہیلا کانگریس کمیٹی کی ایگزیکٹو میٹنگ پیر کو تلک بھون میں منعقد ہوئی، جس میں پر ریاست بھر سے خواتین عہدیداران بشمول کانگریس کی قومی خاتون صدر نیتا ڈیسوزا، خواتین کانگریس کی ریاستی صدر سندھیا سوالاکھے موجود تھیں۔اس موقع پر نانا پٹولے نے خطاب کرتے ہوئے کہا کہ کانگریس پارٹی میں شروع سے ہی خواتین کا احترام کیا جاتا ہے۔ اندرا گاندھی ملک کی پہلی خاتون وزیر اعظم بنیں جب کہ سونیا گاندھی کو وزیر اعظم بننے کا موقع ملا لیکن انہوں نے اس عہدے سے انکار کر دیا۔ پٹولے نے خواتین لیڈروں سے کہا کہ مہنگائی کا مسئلہ آپ کے ہاتھ میں بڑا ہتھیار ہے۔ آپ کو اس پر مودی حکومت کے خلاف احتجاج سخت کرنا چاہیے۔ پٹولے نے کہا کہ ممبئی اور مہاراشٹر میں خواتین کو ہراساں کرنے کے واقعات میں اضافہ ہوا ہے۔ اس معاملے کو بھی سختی سے اٹھایا جانا چاہیے۔ کانگریس کے ریاستی صدر نے کہا کہ خواتین خود کو کمزور نہ سمجھیں۔ ان کے پاس حکومت بدلنے کا اختیار ہے۔ پٹولے نے خواتین کارکنوں سے اپیل کی کہ وہ لوک سبھا اور ودھان سبھا انتخابات کو سامنے رکھتے ہوئے کام کریں اور دہلی میں مودی حکومت کو شکست دیں۔
اس موقع پر مہیلا کانگریس کی قومی صدر نیتا ڈیسوزا نے کہا کہ سابق وزیر اعظم راجیو گاندھی نے خواتین کو بلدیاتی اداروں میں 50 فیصد ریزرویشن دیا تھا۔ ان کی قیادت میں سیاست میں خواتین کی شمولیت کو بڑھانے کے لیے تاریخی کام کیا گیا۔ آج ہمارے پاس 50% ذمہ داری کے ساتھ 50% حصہ ہے۔ جو ذمہ داری آپ کو دی گئی ہے اسے صحیح طریقے سے نبھائیں۔ کرناٹک میں خواتین نے گھر گھر جا کر انتخابی مہم چلائی اور کانگریس کی جیت میں اہم کردار ادا کیا۔ خواتین کو اگلے ہر الیکشن میں انتخابی مہم میں بڑھ چڑھ کر حصہ لینا چاہیے۔ کوئی عہدہ مستقل نہیں ہوتا، پارٹی نے جو ذمہ داری سونپی ہے اس کے ساتھ انصاف کریں۔ نیتا ڈی سوزا نے یہ بھی کہا کہ 2024 کے انتخابات قریب ہیں۔ ایسے میں تمام خواتین کارکنوں کو سخت محنت کرنی چاہئے اور کانگریس کو اقتدار میں لانے کی کوشش کرنی چاہئے۔
اس موقع پر مہیلا کانگریس کی ریاستی صدر سندھیا سوالاکھے نے کہا کہ ریاست میں خواتین پر مظالم میں اضافہ ہوا ہے۔ ممبئی کی لوکل ٹرین میں لڑکی سے چھیڑ چھاڑ کی کوشش کی گئی۔ چرچ گیٹ کے قریب خواتین کے ہاسٹل میں لڑکی کو جنسی زیادتی کا نشانہ بنا کر قتل کر دیا گیا۔ ممبئی میں ایک قاتل نے خاتون کے ٹکڑے ٹکڑے کرنے کا گھناؤنا فعل انجام دیا، ریاست کے دیگر حصوں میں بھی خواتین پر تشدد کے واقعات میں مسلسل اضافہ ہو رہا ہے۔ شندے-فڈنویس حکومت خواتین پر مظالم کو روکنے میں مکمل طور پر ناکام رہی ہے۔ مہیلا کانگریس مرکز اور ریاست میں بی جے پی حکومت کے خلاف مسلسل آواز اٹھا رہی ہے اور خواتین کے مسائل سمیت عوام کے سلگتے ہوئے مسائل پر آواز اٹھاتی رہے گی۔ سوالاکھے نے یہ بھی کہا کہ خواتین آنے والے انتخابات میں بڑی تعداد میں مہم چلائیں گی اور کانگریس کو جیتنے کے لیے اپنی پوری طاقت لگائیں گی۔
