اجیت پوار کو منانے میں شردپوار کامیاب رہے ہونگے: ناناپٹولے
شرد پوار سے متعلق کانگریس اور ادھو ٹھاکرے کی شیوسینا میں کوئی تذبذب نہیں ہے
ممبئی:شرد پوار ایک سینئر اور تجربہ کار لیڈر ہیں۔ان سے ملاقات کے بعد اجیت پوار کی خواہش واپس آنے کی ہوئی ہوگی۔ شردپوار کے بیانات سے ایسا لگتا ہے کہ انہیں اجیت پوار کو منانے میں کامیابی مل گئی ہے۔ یہ باتیں مہاراشٹر پردیش کانگریس کمیٹی کے صدر نانا پٹولے نے کہی ہیں۔
میڈیا سے بات کرتے ہوئے کانگریس کے ریاستی صدر نے کہا کہ شرد پوار کو لے کر کانگریس پارٹی اور ادھو بالا صاحب ٹھاکرے کی شیوسینا کے درمیان کوئی تذبذب نہیں ہے۔ دونوں پارٹیاں مضبوطی سے شرد پوار کے ساتھ مضبوطی سے کھڑی ہیں۔ پٹولے نے کہا کہ این سی پی میں کیا چل رہا ہے اور اس کے لیے کیا کرنا ہے؟ اس کا فیصلہ این سی پی کے لیڈروں کو کرنا ہے۔ کانگریس نے اپنا موقف واضح کر دیا ہے۔ ہم ان پارٹیوں کو ساتھ لے کر لڑیں گے جو بی جے پی کے خلاف لڑنے کے لیے ساتھ آئیں گی۔
لوک سبھا انتخابات میں مہاوکاس اگھاڑی کو زیادہ سیٹیں ملنے کے سروے پر بات کرتے ہوئے نانا پٹولے نے کہا کہ کانگریس پارٹی دو سال سے کہہ رہی ہے کہ آنے والے انتخابات میں کانگریس پارٹی سب سے بڑی پارٹی بن کر ابھرے گی۔ اس سروے سے بھی یہی تصویر دیکھنے کو مل رہی ہے۔ کانگریس پارٹی پر لوگوں کا بھروسہ بڑھتا جا رہا ہے۔لوگوں نے وزیر اعظم نریندر مودی پر بھروسہ کیا اور اکثریت سے اقتدار دیا لیکن مودی نے خود عوام کو دکھائے گئے خوابوں کو توڑ دیا۔ انہوں نے ہر ایک کے کھاتے میں 15 لاکھ روپے جمع کرنے، ہر سال دو کروڑ نوکریاں دینے، کسانوں کی آمدنی دوگنی کرنے، سوامی ناتھن کمیشن کی سفارشات کو نافذ کرنے، بیرون ملک سے کالا دھن لانے سمیت کئی وعدے کیے، لیکن وہ ان میں سے ایک بھی پورا نہیں کر سکے۔ مودی حکومت عوام کی امیدوں پر پورا اترنے میں ناکام رہی ہے۔ اس لیے لوگوں میں بی جے پی اور نریندر مودی کے خلاف سخت ناراضگی ہے۔
پٹولے نے کہا کہ ریاست کی ایکناتھ شندے،دیوندرفڈنویس اور اجیت پوار (ای ڈی اے) حکومت نے بھی لوگوں کو مایوس کیا ہے۔ کسانوں کو لوٹا جا رہا ہے۔ وہ سڑکوں پر ہیں کیونکہ انہیں زرعی پیداوار کی صحیح قیمت نہیں مل رہی ہے۔ نانا پٹولے نے یہ بھی کہا کہ لوگ بی جے پی کی طرزحکومت سے تنگ آچکے ہیں اور جلد اس سے چھٹکارا چاہتے ہیں۔