ناندیڑ۔18ستمبر(نامہ نگار) : ناندیڑ شہر کے معروف قانون داں و مشہور شخصیت الحاج ایڈوکیٹ محمد ممتاز علی قادری کا پچھلے ہفتہ مکہ مکرمہ میں ہارٹ اٹیک کے سبب انتقال ہوگیا۔ مہاراشٹر کے سابقہ چیف منسٹر و ناندیڑ کے رکن پارلیمنٹ اشوک چوہان آج ناندیڑ ایئر پورٹ سے راست ایڈوکیٹ ممتاز قادری کے مکان پہنچے اور اُن کے چھوٹے بھائی سجاد علی قادری‘ بھتیجے طیب علی قادری(جج)‘ فرزندان مظہر علی قادری‘ معروف علی قادری‘ بشیر علی قادری سے ملاقات کرکے انہیں پرسہ دیا۔ اشوک چوہان نے ایڈوکیٹ ممتاز قادری کے انتقال پر غم کا اظہار کرتے ہوئے کہا کہ ناندیڑ شہر ایک مشہور ایڈوکیٹ سے محروم ہوچکا ہے۔ اشوک چوہان نے مرحوم ایڈوکیٹ ممتاز قادری کے بڑے بھائی پرنسپل محمد نظیر علی قادری سے بھی موبائل پر بات کرکے انہیں بھی پرسہ دیا۔ اس موقع پر رکن اسمبلی ڈی پی ساونت‘ امر راجورکر‘ میئر شیلا بھورے‘ کشور بھورے‘ ڈپٹی میئر ونئے پاٹل‘ چیئر مین شمیم عبداللہ‘ سابق میئر عبدالستار‘ کانگریس پارٹی کے ترجمان منتجب الدین‘ سمیت کانگریس کے کارپوریٹر و دیگر قائدین موجود تھے۔
