بھوکر، 13 فروری (ورق تازہ نیوز):ناندیڑ ضلع کے بھوکر پولیس نے غیر قانونی طور پر گوونش جانوروں کی اسمگلنگ کے خلاف بڑی کارروائی کرتے ہوئے مجموعی طور پر 5 لاکھ 16 ہزار روپے مالیت کا مال ضبط کیا ہے۔ اس کارروائی میں 8 گائیں، 3 بچھڑے اور ایک بولیرو لوڈنگ پک اپ گاڑی شامل ہے۔
اس سلسلے میں پولیس اسٹیشن بھوکر میں جرم رجسٹر نمبر 58/2026 کے تحت مہاراشٹر اینیمل پریزرویشن ایکٹ، پریوینشن آف کرولٹی ٹو اینیملز ایکٹ اور بھارتی تعزیرات ہند کی متعلقہ دفعات کے تحت مقدمہ درج کر لیا گیا ہے۔
پولیس ذرائع کے مطابق خفیہ اطلاع پر کارروائی کرتے ہوئے پولیس نے تامسا سے بھوکر کی جانب جانے والی مشتبہ پک اپ گاڑی کو روکنے کی کوشش کی، تاہم ڈرائیور نے تیز رفتاری اور لاپرواہی سے گاڑی بھگا دی۔ بعد ازاں تعاقب کے دوران گاڑی گارگوٹ واڑی سے دیوشی جانے والے ٹرننگ روڈ کے قریب پل کے پاس کھیت میں اتر گئی، جس کے بعد ڈرائیور گاڑی چھوڑ کر فرار ہو گیا۔
پولیس نے موقع پر پہنچ کر گاڑی کی تلاشی لی تو اس میں گوونش کے 11 جانور (8 گائیں اور 3 بچھڑے) نہایت بے دردی اور تکلیف دہ حالت میں بندھے ہوئے پائے گئے، جنہیں مبینہ طور پر ذبح کے لیے لے جایا جا رہا تھا۔ تمام جانوروں کو ویٹرنری ڈاکٹر کے ذریعے طبی معائنہ کے بعد گاؤ شالہ میں منتقل کر دیا گیا ہے۔
ضبط شدہ مال میں:
8 گائیں اور 3 بچھڑے، مالیت: 2 لاکھ 16 ہزار روپے
بولیرو لوڈنگ پک اپ (MH-40-CM-9053)، مالیت: 3 لاکھ روپے
اس کارروائی کی قیادت پولیس سپرنٹنڈنٹ ناندیڑ اویناش کمار کی ہدایت پر کی گئی، جبکہ ایڈیشنل ایس پی ارچنا پاٹل، ایڈیشنل ایس پی سورج گرو اور سب ڈویژنل پولیس آفیسر رام کرشن ملگھنے کی نگرانی میں ٹیم نے کامیابی حاصل کی۔
اس کامیاب کارروائی پر پولیس سپرنٹنڈنٹ ناندیڑ نے بھوکر پولیس ٹیم کی ستائش کی ہے۔ پولیس کے مطابق مفرور ڈرائیور کی تلاش جاری ہے اور مزید تفتیش کی جا رہی ہے۔