رائے دہندگان کی سہولت کے لیے انتخابی مراکز پر ضروری انتظامات کیے جائیں – ضلع الیکشن آفیسر اشوک شنگارے
تھانے (آفتاب شیخ)
سال 2024 کے اسمبلی انتخابات کے سلسلے میں تھانے ضلع انتظامیہ پوری طرح تیار ہے۔ 20 نومبر کو ہونے والی ووٹنگ کے لیے تھانے ضلع کے 18 اسمبلی حلقوں میں رائے دہندگان کے لیے سہولیات کا جائزہ آج ضلع الیکشن آفیسر اشوک شنگارے نے لیا۔ انہوں نے تمام عملے کو ہدایت دی کہ رائے دہندگان کو کسی بھی قسم کی مشکلات کا سامنا نہ کرنا پڑے اور انتخابی عمل پُرامن طریقے سے مکمل ہو۔ اس کے لیے تمام افسران اور عملے کو ذمہ داری اور سنجیدگی کے ساتھ کام کرنا ہوگا۔
ضلع کلکٹر کے دفتر میں منعقدہ اس اجلاس کی صدارت اشوک شنگارے نے کی۔ اجلاس میں نائب ضلع الیکشن آفیسر ویشالی مانے، میونسپل کارپوریشن کے انجینئروں کے ساتھ 18 اسمبلی حلقوں میں انتخابی مراکز کے انتظامات پر کام کرنے والے انجینئرز موجود تھے۔
تھانے میونسپل کارپوریشن کی حدود میں 1,546، کلیان ڈومبیولی میونسپل کارپوریشن میں 1,261، دیہی علاقوں میں 1,124، نوی ممبئی میونسپل کارپوریشن میں 831، میرا بھائندر میں 755، بھونڈی میونسپل کارپوریشن میں 586، الہاس نگر میونسپل کارپوریشن میں 399 اور تمام میونسپلٹیوں میں 453 انتخابی مراکز قائم کیے گئے ہیں۔ ان مراکز پر سہولیات فراہم کرنے کی ذمہ داری متعلقہ میونسپل کارپوریشن اور دیہی علاقوں میں ضلع کونسل کی ہے۔ اشوک شنگارے نے تمام انجینئروں کو ہدایت دی کہ وہ ان مراکز کا بذاتِ خود معائنہ کریں۔
تمام مراکز پر رائے دہندگان کے لیے معلوماتی بورڈ، رہنمائی نشانیاں، معذوروں کے لیے ریمپ، ووٹر اسسٹنس ڈیسک، چھاؤں، پینے کے پانی، صاف ٹوائلٹس، انتظار گاہ، اور موبائل ٹوائلٹ کی سہولت فراہم کرنے کے اقدامات کیے جائیں۔ انتخابی مراکز پر دیگر سہولتیں جیسے کرسیوں، فرسٹ ایڈ اور معذوروں کے لیے وہیل چیئر کا انتظام بھی ہوگا۔ اس کے علاوہ، ووٹنگ عملے کے لیے ضروری سامان بھی فراہم کیا جائے گا۔ اشوک شنگارے نے کہا کہ اگر کسی مرکز میں کوئی مسئلہ ہو تو فوری طور پر اطلاع دی جائے، جس کا بروقت حل نکالا جائے گا۔
اجلاس میں تمام انتخابی مراکز پر دی جانے والی سہولیات کا جائزہ اشوک شنگارے نے (PPT) کے ذریعے انجینئرز سے لیا۔ انہوں نے بتایا کہ وہ خود اور تمام حلقوں میں مقرر کردہ افسران بذات خود مراکز کا معائنہ کریں گے۔
