ایس ایم صمیم مینیجنگ ڈائریکٹر
ریڈینٹ انسٹی ٹیوٹ آف فاؤنڈیشن اسٹڈیز، ناندیڑ
موبائل: 9960942261
تعلیم ایک چراغ ہے جو جہالت کی تاریکی کو روشنی میں بدل دیتا ہے، اور تربیت وہ خوشبو ہے جو انسان کے کردار کو مہکاتی ہے۔ جب تعلیم و تربیت کا یہ خوبصورت امتزاج بچے کی شخصیت میں اُترتا ہے تو ایک صالح، باکردار اور کامیاب انسان وجود میں آتا ہے۔ اس عظیم سفر میں ادارے، اساتذہ، والدین اور سرپرست حضرات کی مشترکہ کوششیں بنیادی حیثیت رکھتی ہیں۔
ادارے کی ذمّہ داریاں:تعلیمی ادارے صرف نصابی تعلیم کے مراکز نہیں، بلکہ بچوں کی شخصیت سازی، اخلاقی تربیت، نظم و ضبط، اور سماجی شعور بیدار کرنے کے میدان ہوتے ہیں۔ ایک اچھا ادارہ بچوں کے اندر تحقیق، تفکر، ایمانداری، ادب اور خلوص جیسی اعلیٰ صفات پیدا کرتا ہے۔ لیکن ادارہ اُس وقت ہی کامیاب ہو سکتا ہے جب والدین کا تعاون ساتھ ہو۔
والدین و سرپرستوں کا کردار:بچوں کی اصل تربیت کا آغاز گھر سے ہوتا ہے۔ بچے کی پہلی درسگاہ ماں کی گود اور باپ کی صحبت ہوتی ہے۔ اگر والدین بچوں کو محبت، وقت، رہنمائی اور مثبت ماحول فراہم کریں تو ادارہ ان صلاحیتوں کو نکھارنے میں کامیاب ہو جاتا ہے۔ افسوس کی بات ہے کہ آج بہت سے والدین صرف ادارے کو ذمہ دار ٹھہرا کر خود غافل ہو جاتے ہیں۔
ادارے اور والدین کا رشتہ:ادارے اور والدین کا رشتہ گاڑی کے دو پہیوں کی طرح ہے۔ اگر ایک پہیہ سست یا خراب ہو جائے تو سفر رک جاتا ہے۔ اسی طرح اگر والدین بچوں کی تعلیم و تربیت میں ادارے کے ساتھ جُڑ کر نہ چلیں، یا ادارہ والدین کو نظرانداز کرے، تو بچے کی مکمل شخصیت سازی ممکن نہیں۔
*ضرورت اس بات کی ہے:*
* والدین روزانہ بچوں کے تعلیمی معمولات پر نظر رکھیں
* بچوں سے گفتگو کریں، ان کے مسائل کو سنیں
* ادارے کی میٹنگز، ورکشاپس اور تقریبات میں شریک ہوں
* اساتذہ سے مسلسل رابطہ رکھیں
* اور سب سے بڑھ کر، بچوں کو وقت دیں اور دعا دیں
*اہم اور آخری بات:*
ایک کامیاب نسل کی تیاری ادارے اور والدین کے اشتراک کے بغیر ممکن نہیں۔ ہمیں چاہیے کہ ہم تعلیم کو صرف نمبروں اور امتحانوں کا نام نہ سمجھیں، بلکہ کردار سازی، اخلاق، اور تربیت کا جامع عمل تصور کریں۔ آیئے، ہم سب مل کر بچوں کی بہتر تعلیم و تربیت کے لیے ایک دوسرے کا ہاتھ تھامیں، ایک دوسرے کا ساتھ دیں، اور ایک روشن، باکردار اور بامقصد نسل تیار کریں۔
🌷 اللہ تعالیٰ ہمیں والدین، اساتذہ اور اداروں کی حیثیت سے اپنی ذمّہ داریوں کو بخوبی ادا کرنے کی توفیق عطا فرمائے۔ آمین