نئی دہلی: (ایجنسی)ذرائع کے مطابق آل انڈیا مجلس اتحاد المسلمین (AIMIM) کے سربراہ اسدالدین اویسی اور مغربی بنگال کے بااثر رہنما ہمایوں کبیر کے درمیان نئی سیاسی صف بندی پر اہم اتفاق رائے ہو گیا ہے۔ دونوں رہنما بہت جلد مشترکہ مورچہ تشکیل دینے کا باضابطہ اعلان کر سکتے ہیں۔
پارٹی ذرائع کا کہنا ہے کہ گزشتہ چند ہفتوں سے دونوں رہنماؤں کے درمیان سیاسی معاملات پر کئی خفیہ ملاقاتیں ہوئیں، جن میں مسلم سیاسی نمائندگی کو مضبوط بنانے کے لیے مشترکہ لائحۂ عمل پر تفصیلی مشاورت کی گئی۔
اے آئی ایم آئی ایم کے اندرونی حلقوں نے تصدیق کی ہے کہ پارٹی نے بنگال اور دیگر مشرقی ریاستوں میں اپنی موجودگی بڑھانے کا فیصلہ کیا ہے، اور اسی سلسلے میں ہمایوں کبیر کا سیاسی اثر و رسوخ اہم کردار ادا کرے گا۔ اطلاعات کے مطابق نئے مورچے کا مقصد نہ صرف علاقائی سیاست میں ایک مضبوط متبادل پیش کرنا ہے بلکہ اقلیتی ووٹرز کو متحد پلیٹ فارم فراہم کرنا بھی اس حکمتِ عملی کا حصہ ہے۔
پارٹی ذرائع کا یہ بھی کہنا ہے کہ آنے والے مہینوں میں جلسوں اور مشترکہ ریلیوں کا سلسلہ شروع کیا جائے گا، جس کے ذریعے دونوں رہنما اپنا سیاسی منشور عوام کے سامنے پیش کریں گے۔
سیاسی مبصرین اسے ملک کی مسلم سیاست میں ایک بڑی پیش رفت قرار دے رہے ہیں، جو آنے والے انتخابات میں نمایاں اثرات مرتب کر سکتی ہے۔