اہم خَبریں: شاہین باغ مظاہرہ کا ہم ایسا حل نکالیں گے جو دنیا کے لیے مثال بنے… سادھنا رام چندرن

by

ہم سپریم کورٹ کی طرف سے شاہین باغ مظاہرین کا نظریہ جاننے آئے ہیں: سادھنا رام چندرن

سپریم کورٹ کے ذریعہ مقرر مذاکرہ کار سنجے ہیگڑے اور سادھنا رام چندرن شاہین باغ پہنچ کر لگاتار شہریت ترمیمی قانون کے خلاف مظاہرہ کر رہے لوگوں، خصوصاً خواتین سے بات چیت کر رہے ہیں۔ سادھنا رام چندرن نے مظاہرین سے ملاقات کرنے سے پہلے میڈیا سے کہا کہ سپریم کورٹ نے مظاہرین کا نظریہ جاننے کے لیے ہمیں بھیجا ہے اور ہم ان سے بات کریں گے، لیکن میڈیا پرائیویسی کو برقرار رکھے۔

شہریت ترمیمی قانون: سنجے ہیگڑے اور سادھنا رام چندرن شاہین باغ مظاہرین سے بات کرنے پہنچے

شاہین باغ میں شہریت ترمیمی قانون کے خلاف مظاہرہ زور و شور سے جاری ہے۔ اس درمیان سپریم کورٹ کے ذریعہ طے کیے گئے مذاکرہ کار سنجے ہیگڑے اور سادھنا رام چندرن شاہین باغ پہنچ گئے ہیں۔ بتایا جاتا ہے کہ وہ شاہین باغ کے حالات کا پہلے جائزہ لیں گے اور اس کے بعد شاہین باغ کے مظاہرین کے ساتھ بیٹھ کر یہ بات کریں گے کہ دھرنا و مظاہرہ کو کس طرح ختم کیا جا سکتا ہے یا پھر دھرنا کو دوسری جگہ منتقل کیا جا سکتا ہے۔ دراصل کالندی کنج-سریتا وہار روڈ پوری طرح سے بند ہے جس سے کافی لوگوں کو آمد و رفت میں پریشانیوں کا سامنا کرنا پڑ رہا ہے۔ شاہین باغ مظاہرین کا کہنا ہے کہ وہ اس وقت تک اپنا دھرنا و مظاہرہ ختم نہیں کریں گے جب تک کہ سی اے اے واپس لیے جانے کا وعدہ مودی حکومت نہیں کرتی۔ دوسری طرف پی ایم نریندر مودی اور مرکزی وزیر داخلہ امت شاہ نے واضح لفظوں میں کہہ رکھا ہے کہ سی اے اے پر وہ ایک قدم بھی پیچھے نہیں ہٹیں گے۔

ایودھیا میں گوشت فروخت کرنے پر لگی پابندی، وجہ کورونا وائرس

اتر پردیش کے ایودھیا شہر میں گوشت بیچنے پر پابندی عائد کیے جانے کی خبریں موصول ہو رہی ہیں۔ میڈیا ذرائع کے مطابق اس پابندی کی وجہ کورونا وائرس ہے۔ دراصل کچھ لوگوں کا ماننا ہے کہ گوشت میں کورونا وائرس چھپا ہوا ہے اس لیے اس کا استعمال کرنے سے بچنا چاہیے۔ قابل ذکر ہے کہ چین میں کورونا وائرس کی وجہ سے اب تک 2 ہزار سے زائد افراد ہلاک ہو چکے ہیں اور کم و بیش 75 ہزار لوگ اب بھی متاثر ہیں۔

معروف وکیل وصی احمد نعمانی کا انتقال، اظہار تعزیت کا سلسلہ شروع

مشہور و معروف وکیل اور اسلامی مفکر وصی احمد نعمانی اس دارفانی سے کوچ کر گئے ہیں۔ ان کے انتقال کی خبر سننے کے بعد لوگوں میں غم و اندوہ کا عالم ہے۔ سپریم کورٹ کے وکیل اور آئی آئی سی سی کے رکن رہ چکے وصی احمد نعمانی قرآن اور سائنس کے تعلق سے کام کرنے کے لیے جانے جاتے ہیں اور سماج میں ان کا رتبہ کافی اعلیٰ و ارفع رہا ہے۔ انھوں نے علی گڑھ مسلم یونیورسٹی سے تعلیم حاصل کی تھی۔ ان کے انتقال کی خبر پھیلنے کے بعد کئی معروف ہستیوں نے تعزیت کا اظہار کیا اور ان کے بلند درجات کے لیے دعائیں کیں۔

سی اے اے پر اقوام متحدہ کے سربراہ بھی فکری مند

پاکستانی دورے پر پہنچے اقوام متحدہ سربراہ اینٹونیو گٹیرس نے ہندوستان میں نافذ شہریت ترمیمی قانون کو لے کر بڑا بیان دیا ہے۔ انھوں نے کہا کہ ہندوستانی پارلیمنٹ میں منظور شدہ نئے ترمیمی شہریت قانون کی وجہ سے 20 لاکھ لوگوں کی شہریت پر خطرہ ہے۔ انھوں نے کہا کہ ان میں سے زیادہ تر مسلم ہیں۔ اقوام متحدہ سربراہ نے کہا کہ مجھے اس سلسلے میں فکر لاحق ہے۔ پاکستانی اخبار ’ڈان‘ کو دیے ایک انٹرویو میں انھوں نے یہ بات کہی ہے۔ اس سے پہلے اقوام متحدہ سربراہ نے کشمیر کو لے کر بھی بیان دیا تھا۔

چنئی: سی اے اے-این آر سی کے خلاف لوگوں نے سکریٹریٹ کی جانب نکالا مارچ

تمل ناڈو اسمبلی اجلاس جاری ہے۔ اس درمیان چنئی میں بڑی تعداد میں لوگ سی اے اے، این پی آر اور این آر سی کے خلاف سکریٹری کی جانب مارچ کر رہے ہیں۔ اس کا ایک ویڈیو سوشل میڈیا پر سامنے آیا ہے جس میں لوگ اس سیاہ قانون کے خلاف نعرے بازی کر رہے ہیں۔


پولس توڑ پھوڑ سے ہوئے نقصان پر جامعہ نے فروغ انسانی وسائل کو بھیجا 2.66 کروڑ کا بل

جامعہ ملیہ اسلامیہ نے وزارت برائے فروغ انسانی وسائل کو 2.66 کروڑ کا بل بھیجا ہے۔ یہ بل دہلی پولس کے ذریعہ جامعہ کیمپس میں گھس کر توڑ پھوڑ کیے جانے سے ہوئے نقصان کی بھرپائی سے متعلق ہے۔ دراصل گزشتہ 15 دسمبر کو دہلی پولس یونیورسٹی کیمپس میں گھسی تھی اور ان کی کارروائی میں جامعہ کی ملکیت کو زبردست نقصان پہنچا تھا جن میں 25 سی سی ٹی وی کیمرے بھی شامل ہیں۔ بتایا جاتا ہے کہ صرف سی سی ٹی وی کیمروں کی وجہ سے ہی تقریباً 5 لاکھ روپے کا نقصان ہوا۔

مودی حکومت کو جھٹکا، ٹرمپ نے کہا ’ہندوستان کے ساتھ نہیں ہوگا کوئی بڑا سمجھوتہ‘

امریکی صدر ڈونالڈ ٹرمپ ہندوستان دورہ پر آنے والے ہیں۔ ہندوستان دورہ پر آنے سے پہلے واشنگٹن میں ٹرمپ نے میڈیا سے بات چیت کی۔ انھوں نے کہا کہ وہ پی ایم مودی کو واقعی میں بہت پسند کرتے ہیں، لیکن فی الحال تجارتی سمجھوتہ نہیں کر سکتے اور آگے اس پر غور کریں گے۔ انھوں نے کہا کہ وہ ابھی اس بارے میں کچھ پختہ نہیں کہہ سکتے کہ ایسا کوئی بڑا سمجھوتہ امریکی انتخاب سے پہلے ہو پائے گا یا نہیں، لیکن آگے چل کر کوئی چھوٹا تجارتی سمجھوتہ ہو سکتا ہے۔


دہلی ہائی کورٹ میں یونیفارم سول کوڈ پر سماعت آج

دہلی ہائی کورٹ میں آج یونیفارم سول کوڈ کے مطالبہ والی عرضی پر سماعت ہوگی۔ اس معاملے میں مرکزی حکومت سے جواب طلب کی گئی ہے۔ قابل ذکر ہے کہ پورے ملک میں یکساں قانون کی بات کافی وقت سے چل رہی ہے اور اس کے خلاف آوازیں اٹھتی رہی ہیں۔


یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – بشکریہ قومی آواز بیورو

اپنی رائے یہاں لکھیں

Discover more from ورق تازہ

Subscribe now to keep reading and get access to the full archive.

Continue reading