اہم خبر: اتر پردیش میں ’شوبھا یاترا‘ نکالے جانے کے بعد ماحول کشیدہ

اتر پردیش: بریلی میں جنم اشٹمی کے ’شوبھا یاترا‘ پر پتھراؤ، 5 زخمی

بریلی: اترپردیش کے ضلع بریلی واقع دیوریا علاقے میں کرشن جنم اشٹمی کی مناسبت سے نکالے جا رہے جلوس پر شرپسند عناصر کی جانب سے کیے گئے پتھراؤ کی وجہ سے مچی بھگدڑ میں خاتون سمیت پانچ افراد شدید طور سے زخمی ہوگئے۔ سپرنٹنڈنٹ آف پولس (دیہات) سنسار سنگھ نے ہفتہ کے روز بتایا کہ دیوریا علاقے کے مکری ندی گاؤں میں جنم اشٹمی پر جلوس کئی سالوں سے نکالا جارہا تھا جب کچھ شرپسند عناصر نے جلوس میں رکاوٹ پیدا کرنے کی کوشش کی اور جلوس پر پتھراؤ کردیا۔ جس سے بھگدڑ مچ گئی جس میں خاتوں سمیت پانچ لوگ زخمی ہوگئے۔اس درمیان بعض افراد کی جانب سے ہتھیار بھی لہرائے گئے۔ انہوں نے بتایا کہ اطلاع ملتے ہی دیوریا تھانہ انچارج اور سرکل افسر آلوک اگہری موقع پر پہنچ گئے۔ چار تھانوں کی فورس و پی ایس سی کو بلا لیا گیا ہے۔ایس پی دیہات سنسار سنگھ نے موقع واردات پرپہنچ کر پورے معاملے کی جانکاری لی۔

ارون جیٹلی کے انتقال پر کانگریس کا اظہارِ غم

ارون جیٹلی کی موت کی خبر ملنے کے بعد کانگریس نے اپنے ٹوئٹر ہینڈل سے اظہارِ تعزیت کیا ہے۔ کانگریس نے کہا ہے کہ ’’ارون جیٹلی کے انتقال کی خبر سے ہمیں بہت تکلیف ہوئی ہے۔ ان کے اہل خانہ کے تئیں ہماری ہمدردی ہے۔ غم کے اس وقت میں ہماری دعائیں ان کے ساتھ ہیں۔‘‘


زندگی اور موت کی جنگ میں ہار گئے ارون جیٹلی، دنیائے فانی کو کہا الوداع

بالآخر سابق مرکزی وزیر مالیات ارون جیٹلی نے ہمیشہ کے لیے آنکھیں موند لیں۔ گزشتہ کئی دنوں سے ایمس میں زندگی اور موت کی جنگ لڑ رہے بی جے پی کے مشہور و معروف لیڈر ارون جیٹلی نے ایمس اسپتال میں 12 بج کر 7 منٹ پر آخری سانس لی۔ ان کے انتقال کی خبر سے ان کے اہل خانہ و شیدائیوں مین غم و اندوہ کی لہر پھیل گئی ہے۔ جیٹلی کے انتقال کی خبر پھیلنے کے بعد سیاسی و سماجی لیڈروں کے ذریعہ تعزیت کا سلسلہ بھی شروع ہو گیا ہے۔


11 اپوزیشن لیڈروں سمیت راہل گاندھی بذریعہ طیارہ سری نگر روانہ

کانگریس لیڈر راہل گاندھی سری نگر کے لیے فلائٹ میں سوار ہو چکے ہیں۔ جموں و کشمیر کے حالات کا جائزہ لینے کے لیے راہل گاندھی کے علاوہ 11 دیگر اپوزیشن لیڈران بھی سری نگر کے لیے فلائٹ پکڑ چکے ہیں۔ جن اپوزیشن لیڈروں نے سری نگر کے لیے فلائٹ پکڑی ہے ان میں ڈی راجہ، شرد یادو، مجید میمن اور منجو جھا وغیرہ شامل ہیں۔



سری نگر دورہ کے لیے راہل گاندھی گھر سے نکلے

راہل گاندھی اپوزیشن پارٹی لیڈران کے ایک وفد کے ساتھ آج جموں و کشمیر کا دورہ کرنے والے ہیں اور اس دورہ کے لیے وہ اپنے دہلی واقع گھر سے نکل چکے ہیں۔ حالانکہ گورنر نے انھیں یہ دورہ کرنے کے لیے منع کیا ہے اور میڈیا ذرائع کے مطابق انھیں سری نگر ائیر پورٹ پر ہی روکا جا سکتا ہے۔


ہریانہ: کرنال میں 54 سالہ خاتون کی اجتماعی عصمت دری

ہریانہ کے کرنال میں ایک 54 سالہ خاتون کے ساتھ اجتماعی عصمت دری کا واقعہ پیش آیا۔ واقعہ 14 اگست کا ہے۔ متاثرہ خاتون کا علاج روہتک کے ایک اسپتال میں چل رہا ہے۔ پولس کیس درج کر معاملے کی جانچ کر رہی ہے۔


مہاراشٹر: بھیونڈی میں چار منزلہ عمارت منہدم، 2 لوگوں کی موت، راحتی کام جاری

مہاراشٹر کے بھیونڈی کے شانتی نگر علاقے میں ایک چار منزلہ عمارت منہدم ہو گئی ہے۔ اس واقعہ میں دو لوگوں کی ہلاکت کی خبریں موصول ہوئی ہیں اوربتایا جا رہا ہے کہ کچھ لوگ اب بھی ملبے میں دبے ہوئے ہیں۔ راحتی کام فوری طور پر شروع کیا جا چکا ہے اور خبروں کے مطابق اب تک چار لوگوں کو محفوظ اس ملبے سے باہر بھی نکالا گیا ہے۔ زخمیوں کو قریب کے آئی جی ایم اسپتال میں علاج کے لیے داخل کرایا گیا ہے۔


یہ ایک سینڈیکیٹیڈ فیڈ ہے ادارہ نے اس میں کوئی ترمیم نہیں کی ہے. – Source بشکریہ قومی آواز بیورو—-

اپنی رائے یہاں لکھیں