امریکی فوج نے کہا ہے کہ ایران میں فضائی دفاع کے نظام، میزائلز اور ڈرونز کی ذخیرہ گاہوں سمیت تقریباً 90 فوجی اہداف کو نشانہ بنایا گیا۔ ایران کے پاسداران انقلاب نے کویت میں عریفجان اور علی السالم، جبکہ بحرین میں الجفیر اور شیخ عیسیٰ کے امریکی اڈوں پر جوابی حملے کرنے کا دعویٰ کیا ہے۔
امریکی حملوں میں تین افراد ہلاک، ایرانی میڈیا
ایران کے سرکاری ذرائع ابلاغ کے مطابق، رات بھر ہونے والے امریکی حملوں میں تین افراد ہلاک ہو گئے ہیں۔
رپورٹس کے مطابق ایران کے جنوب مغربی صوبے خوزستان کے نائب گورنر نے بتایا کہ اہواز شہر کے نواحی علاقے پر کیے گئے حملے میں متعدد افراد زخمی بھی ہوئے ہیں۔
نائب گورنر کے بیان کے مطابق، امریکی حملوں نے علاقے میں جانی نقصان پہنچایا، تاہم زخمیوں کی درست تعداد یا حملے کی نوعیت کے بارے میں مزید تفصیلات فوری طور پر سامنے نہیں آئیں۔
ایرانی حکام کی جانب سے واقعے کی مزید تحقیقات اور نقصانات کا جائزہ لیا جا رہا ہے، جبکہ اس حوالے سے امریکی حکام کی جانب سے فوری ردِعمل کی اطلاعات موصول نہیں ہوئیں۔
رات بھر کے حملوں میں تین خلیجی ممالک کو نشانہ بنایا گیا
ایران کے کم لاگت والے ڈرونز نے اسرائیل اور امریکہ کے خلاف جاری جنگ میں خاصی تباہی مچائی ہے
ایران کی فوج کا کہنا ہے کہ اس نے کویت، قطر اور بحرین میں موجود امریکی فوجی تنصیبات کو ڈرون حملوں کے ذریعے نشانہ بنایا ہے۔
فوج کے مطابق کویت میں امریکی پیٹریاٹ میزائل سسٹم، قطر میں سیٹلائٹ اینٹینا ارلی وارننگ سسٹم، اور بحرین میں امریکی ایندھن ذخیرہ کرنے کی تنصیبات کو مختلف اقسام کے بڑی تعداد میں ڈرونز کے ذریعے ہدف بنایا گیا۔
ایرانی فوج کا کہنا ہے کہ یہ حملے ’کچھ ہی دیر پہلے‘ کیے گئے اور یہ خطے میں موجود امریکی اڈوں پر ایران کے ’جاری حملوں‘ کا تسلسل ہیں۔
یہ بیان ایران کے متعدد ذرائع ابلاغ، بشمول سرکاری نشریاتی ادارے، کی جانب سے شائع کیا گیا ہے۔
اس سے قبل کئی خلیجی ممالک، جن میں بحرین، کویت اور قطر شامل ہیں، حملوں کی اطلاعات دے چکے ہیں یا سکیورٹی الرٹس جاری کر چکے ہیں۔
بحرین کا دعویٰ: فضائی دفاعی نظام نے ایران کے متعدد حملے ناکام بنا دیے بحرین کی فوج کا کہنا ہے کہ اس کے فضائی دفاعی نظام نے آج صبح ایران کی جانب سے داغے گئے متعدد حملہ آور اہداف کو فضا میں ہی تباہ کر دیا۔
یہ بیان ایرانی فوج کے اس دعوے کے بعد سامنے آیا ہے جس میں کہا گیا تھا کہ اس نے بحرین میں امریکی ایندھن ذخیرہ کرنے کی تنصیبات کو ڈرون حملوں کا نشانہ بنایا ہے۔